Құқық
ЖАБЫН ПЛИТА ОПЫРЫЛЫП, ЕКІ АДАМ МЕРТ БОЛДЫ
Алаш тасжолы көшесі бойындағы құрылыс жұмыстары жүріп жатқан нысанның жабын плиталары құлап, екі адам қаза тауып, бір адам ауыр халде қалалық аурухананың жансақтау бөліміне жеткізілді. Олардың барлығы да Өзбекстан азаматтары екені белгілі болып отыр.
Осыған байланысты Астана қаласы Ішкі істер департаментінің тергеу басқармасы «Екі және одан да көп адамның өліміне алып келген құрылыс жұмыстары қауіпсіздігін сақтамау» бабы бойынша қылмыстық іс қозғады.
Қазір белгілі болып отырғанындай, қабырғаның опырылып түсуі плитаның үстіне шамадан тыс құрылыс материалдарының қойылуынан болған. Тергеу органы осындай салғырттық пен жауапсыздыққа жол берген құрылыс нысанының басшысы 1970 жылы туған азаматты қамауға алды.