«Жастардың тұрақты және әлеуметтік даму қоры» қоғамдық бірлестігі Нұр-Сұлтан қаласы Қоғамдық даму істері басқармасының тапсырысымен «Сындарлы қоғамдық диалог – Қазақстанның тұрақтылығы мен өркендеуінің негізі» тақырыбында диалог алаңын өткізді.
Бұл басқосуда көпбалалы аналарға қатысты сөз қозғалып, қоғамдық ұйымдар арқылы әлеуметтік жағынан осал топтарға жататын азаматтарға жәрдем көрсету жайы талқыланды. Нұр-Сұлтан қаласы мәслихатының депутаты Қарақат Абден жиналған қауым алдында Президент Жолдауындағы «Халық үніне құлақ асатын мемлекет» тақырыбын қозғап, депутаттар әрдайым диалогқа дайын екенін жеткізді. «Шеберлер Альянсы» бастамашыл тобының төрағасы, «Береке – Астана» қоғамдық ұйымның директоры Рауза Балмағамбетова Мемлекет басшысы Қ.Тоқаевтың биылғы Жолдауында айқындалған әлеуметтік мәселелерді шешуге бағытталған шаралар туралы баяндап беріп, өз тарапынан қол-шеберлер орталығында тегін шебер-кластар өткізілетінін және орта және кіші кәсіпкерлерге көмек ретіндегі «Бастау» бағдарламасының мүмкіндіктері жайлы ойымен бөлісті. Ал «Nasledie» қоғамдық бірлестігінің директоры Маржан Абдуллина көпбалалы ана ретінде мемлекеттен қандай көмек берілетінін және оны қалай алуға болатынын өз тәжірибесімен байланыстырып айтып берді.
Диалог алаңында сондай-ақ қала әкімдігінің дін проблемаларын зерттеу орталығының басшысы Жапал Долиев, Ақпараттық түсіндіру, оңалту және бейімдеу бөлімінің басшысы Гүлмира Серікбаева және «Жас ұлан» бірыңғай балалар мен жасөспірімдер ұйымы РҚБ жобалар менеджері Аида Исханова да әлеуметтік жағынан қамқорлыққа мұқтаж азаматтарға қажетті ақпараттармен бөлісті.
Сәуле БЕЙСЕНБЕКОВА
