ЗЕЙНЕТАҚЫ МЕН ЖӘРДЕМАҚЫ КӨБЕЙДІ
1 шілдеден бастап еліміздегі 2,1 млн зейнеткердің жасына байланысты және еңбек сіңірген жылдары бойынша берілетін зейнетақы мөлшері 11 пайызға артады.
Нақты айтқанда, 2017 жылдың 1 шілдесінен бастап базалық зейнетақы төлемінің мөлшері 14466 теңгені құрайды. Сол сияқты ана мен баланы қолдау мақсатында бала туғанда берілетін біржолғы жәрдемақы мөлшері 20 пайызға артады. Яғни, бала туғанда берілетін біржолғы мемлекеттік жәрдемақы бірінші, екінші және үшінші балаға – 38 АЕК немесе 86222 теңге; төртінші және одан да көп балаға – 63 АЕК немесе 142947 теңге болады.
Қазіргі уақытта Астана қаласының «Әлеуметтік төлемдерді ведомствоаралық есептеу орталығы» департаменті зейнетақы мен жәрдемақы мөлшерлерін қайта есептеу бойынша барлық тиісті жұмыстарды жүргізді.
– «Қазақстанның үшінші жаңғыруы: жаһандық бәсекеге қабілеттілік» атты Елбасы Жолдауында атап өткен тапсырманы орындау зейнетақы төлемдерінің мөлшері 11 пайызға артады. Қайта есептеу автоматты түрде жүзеге асырылды, сондықтан зейнетақы алушылардың біздің мекемеге осы мәселе бойынша қосымша жүгінуі қажет емес, – дейді Әлеуметтік төлемдерді ведомствоаралық есептеу орталығы департаментінің директоры Гаухар Мұханбетжанова.
Гүлмира АЙМАҒАНБЕТ