استانا قالاسىنداعى «الاۋ» مۇز سارايىندا رەسپۋبليكا كۇنىنە ارنالعان ۇلدار مەن قىزدار اراسىندا سەمسەرلەسۋدەن «استانا قىلىشى» رەسپۋبليكالىق ءتۋرنيرى ءوتتى.
رەسپۋبليكالىق جارىستىڭ جۇلدەلەرىن ەلىمىزدەگى 100-گە جۋىق ۇزدىك سەمسەرلەسۋشى ساراپقا سالدى.
جارىستىڭ اشىلۋ سالتاناتىندا استانا قالاسى دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ پەن استانا قالاسى سەمسەرلەسۋ فەدەراتسياسىنىڭ پرەزيدەنتى ەرجان نۇسىپبەكوۆ قاتىسىپ, جارىسقا قاتىسۋشىلاردى رەسپۋبليكا كۇنىمەن قۇتتىقتاپ, سايىستا ساتتىلىك تىلەدى.
«استانا قالاسىندا داستۇرگە اينالعان سەمسەرلەسۋدەن رەسپۋبليكالىق ءتۋرنيردىڭ اۋقىمى كەڭەيىپ, «استانا قىلىشى» ءتۋرنيرى اتالىپ, بيىل ون ءبىرىنشى رەت وتكىزىلىپ وتىر. بۇل جارىسقا جىلدان-جىلعا جاستاردىڭ كوپتەپ قاتىسۋى قۋانتادى. مەملەكەت باسشىسىنىڭ تاپسىرماسى بويىنشا بۇقارالىق سپورتقا ەرەكشە كوڭىل بولۋدەمىز. بۇگىنگى جارىس الدىمىزداعى ۇلتتىق مەرەكەمىز – رەسپۋبليكا كۇنىنە ورايلاستىرىپ ۇيىمداستىرىلدى. بۇل دەگەنىمىز – قالامىزداعى ءوتىپ جاتقان اۋقىمدى شارالار – بۇقارالىق سپورتتى دامىتۋداعى ۇلكەن قادام. وسى ورايدا, بۇگىنگى جارىستى ۇيىمداستىرۋشىلارعا ەلىمىزدىڭ سپورت سالاسىن دامىتۋعا قوسقان ۇلەسى ءۇشىن زور العىسىمدى بىلدىرەمىن. سپورتشىلارعا جەڭىس تىلەيمىن. شىن مىقتىلار توپ جارسىن. «استانا قىلىشى» رەسپۋبليكالىق تۋرنيرىنە قوش كەلدىڭىزدەر!» دەدى استانا قالاسى دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ ءداستۇرلى ءتۋرنيردىڭ اشىلۋ سالتاناتىندا.
سەمسەرلەسۋشىلەر جەكە جانە كوماندالىق ەسەپتە كۇش سىناستى. جارىس قارۋدىڭ قىلىش, قانجار جانە نايزا سەكىلدى ءۇش ءتۇرى بويىنشا ءوتتى.
«استانا قىلىشى» ءتۋرنيرى ەلىمىزدە سەمسەرلەسۋدى كەڭىنەن ناسيحاتتاۋ جانە قازاقستاندىقتاردىڭ وسكەلەڭ ۇرپاعىن زياتكەرلىك كۇرەستىڭ وسى تۇرىنە تارتۋ, سونداي-اق تۋرنيرگە قاتىساتىن ەلىمىزدىڭ جاس سپورتشىلارىنىڭ سپورتتىق شەبەرلىك دەڭگەيىن ارتتىرۋ جانە دە قازاقستان رەسپۋبليكاسىنىڭ سپورتتىق قاتىناستارىن نىعايتۋ جانە جاستار اراسىندا سالاۋاتتى ءومىر سالتىن ناسيحاتتاۋ ماقساتىندا وتكىزىلدى. سونداي-اق بۇل جارىس قاراشا ايىنىڭ باسىندا شىمكەنتتە وتەتىن كادەتتەر مەن جاسوسپىرىمدەر اراسىنداعى قازاقستان چەمپيوناتى الدىنداعى دايىندىق جارىسى بولىپ وتىر.
«استانا قىلىشى» ءتۋرنيرىنىڭ جەڭىمپازدارى مەن جۇلدەگەرلەرى 16 قازاندا بەلگىلى بولادى. ۇزدىك سەمسەرلەسۋشىلەر استانا قالاسى دەنە شىنىقتىرۋ جانە سپورت باسقارماسى تاعايىنداعان مەدالدارمەن, ءتيىستى دارەجەدەگى ديپلومدارمەن, كۋبوكتارمەن جانە باعالى سىيلىقتارمەن ماراپاتتالادى.
