ايەل دەپۋتاتتى الەۋمەتتىك ماسەلە كوبىرەك الاڭداتادى
قاراقات ابدەن – بەلسەندى دەپۋتاتتاردىڭ ءبىرى. توعىز ايدىڭ ىشىندە ول ءبىرشاما ىستەر اتقارىپ ۇلگەرگەن. ءبىر عانا مىسال, جۋىردا دەپۋتات حانىمنىڭ ارقاسىندا بەس جىلدان بەرى كوتەرىلمەي كەلە جاتقان مەكتەپكە دەيىنگى جەكەمەنشىك مەكەمەلەردى دوتاتسيالاۋ ماسەلەسى كوتەرىلدى. سونىمەن قاتار, وسىعان دەيىن 18 ءارتۇرلى باسشىلىققا دەپۋتاتتىق ساۋال جىبەرىلگەن.
كەيىپكەرىمىز بىرىنشىدەن دەپۋتات, سۇيىكتى جار جانە عالىم ەكونوميكا عىلىمىنىڭ كانديداتى. «جالپى, ادام تەك تابىس تابۋدى عانا ويلاماۋ كەرەك. انا رەتىندە ويلاناتىن دەپۋتات بولعىم كەلەدى. ماسەلەن, مەن – ءۇش بالانىڭ اناسىمىن. كۇن سايىن اينالامنان نەشە ءتۇرلى ماسەلەنى كورەمىن. ءبىز ءتىل, ءتىل دەيمىز دە, بىراق ناقتى ەشتەڭە بەرە المايمىز. ءبىر كەزدەرى قازاق تىلىندەگى ەرتەگىلەردى بالالارىما تاۋىپ بەرۋ مۇڭ بولاتىن. قازىر بۇل ماسەلە رەتتەلىپ كەلەدى. وسىعان وراي, اعىلشىن, قازاق ءتىلىن جۇيەلى وقىتۋعا بايلانىستى ۇسىنىستارىم بار. ونىڭ ۇستىنە, دەپۋتاتتاردىڭ دەنى – ەر ازاماتتار. ال الەۋمەتتىك ماسەلەلەردى كىم شەشەدى؟ ارينە, دەپۋتاتتاردىڭ اراسىندا اقىلدى, جان-جاقتى ويلايتىن ازاماتتار كوپ. دەسە دە, ايەل زاتىنىڭ جاعدايىن تەك ايەل عانا بىلەدى. ايەل نە ايتۋى مۇمكىن؟ ول وتباسى مەن بالاسى تۋرالى, دەنساۋلىق پەن ءبىلىم, مادەنيەت پەن مورال جايىندا ايتادى. سوندىقتان ماعان سەنىم ارتقان ەكەن, دەمەك, مەن ەڭ باستىسى وتباسى, بالالار, ايەل تاقىرىبىن كوبىرەك قاۋزايمىن. بىراق, حالىق قالاۋلىسى بولعاننان كەيىن ءبىر عانا نارسەمەن شەكتەلىپ قالۋعا بولمايدى. دەپۋتات جان-جاقتى بولۋعا, اينالاسىنداعى بارلىق ماسەلەنى كورە بىلۋگە مىندەتتى. مۇنىڭ الدىندا 12 جىل قارجى مينيسترلىگىندە, سالىق سالاسىندا ەڭبەك ەتتىم. وسى تاجىريبەمنىڭ ءبارى جۇمىس بارىسىندا كومەگىن تيگىزىپ, اتالعان ماسەلەگە جان-جاقتى قاراۋدى ۇيرەتتى. جاسىم ۇلعايعان سايىن وتباسى, بالا تۋرالى ازاماتتىق پوزيتسيام ارتىپ كەلەدى» دەيدى قاراقات جاقسىلىققىزى.
قاراقات ابدەننىڭ جۇمىس ۇستەلىندە تۇراقتى كوميسسياسىنىڭ ماجىلىسىندە قارالاتىن استانا قالاسىنىڭ سالاۋاتتى ءومىر سالتىن قالىپتاستىرۋدىڭ مەملەكەتتىك ساياساتىن ىسكە اسىرۋ جاعدايلارى جانە شارالارى تۋرالى قۇجاتتار جاتىر ەكەن. سۇحباتتاسۋعا كەلەر الدىندا وسى قاعازدارمەن مۇقيات تانىسىپ وتىرعاندىعىن جەتكىزدى. ياعني, قالامىزدا ءاربىر اۋلادا ۆوركاۋت ترەناجەر الاڭدارى كوپتەپ سالىنسا ءتيىمدى بولاتىنىن ايتتى. ول بىرىنشىدەن ارزانعا تۇسسە, ەكىنشىدەن جاس تا, جاسامىس تا قالاۋىنشا سپورتپەن شۇعىلدانا الادى.
جۋىردا دەپۋتات ق.ابدەننىڭ قابىلداۋىنا جالعىزباستى ايەل كەلگەن ەكەن. ول كۇيەۋىنەن اجىراسىپ كەتكەندىگىن جانە ەكى بالاسى ءۇشىن ماتەريالدىق كومەك العىسى كەلەتىنىن ايتىپتى. العاشىندا قاراقات جاقسىلىققىزى ءار ايەل وتباسىن ساقتاپ قالۋعا مىندەتتى ەكەندىگىن ءبىلدىردى. سويلەسە كەلە الگى كەلىنشەكتىڭ ۇلكەن بالاسى اۋتيزممەن اۋىراتىنى, كۇيەۋى سول ءۇشىن تاستاپ كەتكەندىگى بەلگىلى بولادى. ال ەكىنشى بالاسىن بالاباقشاعا ورنالاستىرا الماي ءجۇر ەكەن. سودان دەپۋتات حانىم ۇلكەن بالاسىن وڭالتۋ ورتالىعىندا ءوتىپ كەتكەن كەزەگىن قايتا قالپىنا كەلتىرتكىزىپ, كىشى بالاسىن كاسىپكەر قۇربىسىنا ءوتىنىش جاساپ, جەكەمەنشىك بالاباقشاعا تەگىن ورنالاستىرادى.
اڭگىمە بارىسىندا دەپۋتات قاراقات ابدەن ەلوردادا مۇگەدەك بالالارعا ارنالعان مەملەكەتتىك وڭالتۋ ورتالىقتارى كوپتەپ سالىنۋ كەرەكتىگىن ايتتى. سەبەبى, استاناداعى بار ورتالىق جەكەنىڭ قولىندا كورىنەدى.
دەپۋتات ءۇشىن استانا قالاسىندا جاس قىزداردىڭ تاربيەسى وتە وزەكتى. ول – «قازاق قىزى» قوعامدىق بىرلەستىگىنىڭ ءتورايىمى, «قازاق قىزى» مادەني-يناباتتىلىق قىزدار ينستيتۋتىنىڭ اۆتورى جانە قۇرىلتايشىسى. بۇرىن «قازاق قىزى» مادەني-يناباتتىلىق قىزدار ينستيتۋتىندا جەتىم جانە كوپبالالى انالاردىڭ قىزدارى دا ءبىلىم السا ەكەن دەپ ارمانداعان ەكەن. سول نيەتى اكىمدىكتىڭ قولداۋىمەن مامىر ايىندا جۇزەگە اسىپ, الەۋمەتتىك از قامتىلعان وتباسىلاردىڭ, كوپ بالالى وتباسىلاردىڭ قىزدارى ينستيتۋتتا ءبىلىم الىپ جاتىر.
دەپۋتاتتىڭ الەۋمەتتىك جەلىلەر – «فەيسبۋك» پەن «ينستاگرامدا» پاراقشاسى بار. سايلاۋشىلارىمەن اركەز بايلانىستا. «ماعان تەك ءبىر عانا نارسە جەتپەيدى – ول ۋاقىت. 24 ساعات ماعان از. وسى ۋاقىتىمدى پايدالى ىسكە جۇمساعانىمدى ءجون كورەمىن. جۇمىسىمنىڭ ناتيجەسىن كورسەم, ءوزىمدى باقىتتى سەزىنەمىن» دەيدى دەپۋتات.
جانسايا سىدىقباي