كەشە مەملەكەت باسشىسى نۇرسۇلتان نازارباەۆ «ارقانكەرگەن» شەكارالىق بەكەتىندەگى وقيعاعا بايلانىستى قۇقىق قورعاۋ ورگاندارى باسشىلارىمەن كەڭەس وتكىزدى.
قر پرەزيدەنتى ءباسپاسوز قىزمەتىنىڭ حابارلاۋىنشا, كەڭەستە مەملەكەت باسشىسى مىناداي مالىمدەمە جاسادى:
«ەلىمىزدىڭ شىعىس ايماعىندا الماتى وبلىسىنداعى «ارقانكەرگەن» شەكارالىق بەكەتىندە قايعىلى وقيعا بولدى. ونىڭ سالدارىنان 15 ادام – 14 شەكاراشى جانە ءبىر قورىقشى قازا تاپتى.
مەن مۇنى لاڭكەستىك اكت دەپ سانايمىن. بۇل ءسىرا, ىشكى جانجالداردىڭ ناتيجەسىندە بولعان بولۋى ءتيىس. الايدا, بۇل تۋرالى ايتۋ ءالى ەرتە. ساربازداردىڭ كازارماسى مەن وفيتسەرلەر ءۇيى ورتەلگەن. قازا بولعانداردىڭ ءمايىتى ۇيىندىلەردى ارشۋ كەزىندە تابىلدى. بۇل وقيعا بەيبىت كەزدە بولىپ وتىر. سوندىقتان دا ەگجەي-تەگجەيلى تەكسەرۋدى تالاپ ەتەدى.
قازىرگى كەزدە مەنىڭ تاپسىرمام بويىنشا ارنايى كوميسسيا وقيعانىڭ ءمان-جايىن انىقتاۋدا, بارلىق فاكتىلەر زەرتتەلۋدە. باس اسكەري پروكۋراتۋرا قىلمىستىق ءىس قوزعادى. ورتالىق جانە جەرگىلىكتى قۇقىق قورعاۋ ورگاندارى ءىستىڭ ءمان-جايىن انىقتاپ, قىلمىسقا كۇدىكتىلەردى ۇستاۋ ءۇشىن بارلىق كۇش-جىگەرىن جۇمساۋدا. تەكسەرۋ جۇمىستارىنا ءىىم, ۇقك جانە باس پروكۋراتۋرانىڭ تاجىريبەلى قىزمەتكەرلەرى تارتىلدى. قازىر بۇل كوميسسيا وقيعا ورنىندا جۇمىس ىستەپ جاتىر.
مەن جاعدايدى مۇقيات تەكسەرىپ, سەبەبىن انىقتاۋعا نۇسقاۋ بەردىم. بۇدان كەيىن ءتيىستى شارالار قولعا الىناتىن بولادى. ۇكىمەتكە قازا تاپقانداردىڭ وتباسىلارىنا كومەك كورسەتۋدىڭ جانە ولارعا قولداۋ جاساۋدىڭ بارلىق ماسەلەلەرىن باقىلاۋعا الۋدى تاپسىرامىن.
مەن قازا بولعان جاس جىگىتتەردىڭ بارلىق تۋىستارى مەن جاقىندارىنا كوڭىل ايتامىن», – دەدى نۇرسۇلتان نازارباەۆ.
