Maqsut Narikbayev University حالىقارالىق جۋرناليستيكا مەكتەبىندە «Al Jazeera Week» – «Al Jazeera اپتالىعى» سالتاناتتى تۇردە اشىلدى. شارانى MNU حالىقارالىق جۋرناليستيكا مەكتەبى, قر پرەزيدەنتى تەلەراديوكەشەنى جانە Al Jazeera Media Network ازىرلەگەن. اپتالىقتىڭ اشىلۋىندا Maqsut Narikbayev University باسقارما توراعاسى تالعات نارىكباەۆ پەن Al Jazeera مەديا ينستيتۋتىنىڭ ديرەكتورى ەمان ءال-امري ىنتىماقتاستىق تۋرالى مەموراندۋمعا قول قويدى.
«Al Jazeera – الەمدەگى ەڭ ءىرى جانە ىقپالدى جاڭالىق جەلىلەرىنىڭ ءبىرى. سوندىقتان بۇل ءبىزدىڭ ۋنيۆەرسيتەت ءۇشىن, ەل ءۇشىن جانە قازىر وسىندا وقيتىن ستۋدەنتتەر ءۇشىن كەرەمەت مۇمكىندىك. Al Jazeera ءوزىنىڭ جۋرناليستىك ادىلدىگىمەن تانىمال, وڭىرلىك جانە حالىقارالىق وقيعادارعا كەڭ اۋقىمدى كوزقاراس ۇسىنادى. بۇل مەموراندۋم اكادەميالىق سالاداعى ەكىجاقتى ءوزارا ءىس-قيمىلعا جول اشادى جانە قازاقستاندىق جۋرناليستيكا ءۇشىن الەمدىك دەڭگەيدەگى كاسىبي كادرلاردى دايارلاۋعا ىقپال ەتەدى», – دەدى ت. نارىكباەۆ.
Al Jazeera مەديا ينستيتۋتىنىڭ ديرەكتورى ەمان ءال-ءامريدىڭ ايتۋىنشا, ىنتىماقتاستىق تۋرالى مەموراندۋم مەديا سالاسىندا بارلىق قاجەتتى داعدىلار مەن قۇزىرەتتەردى الۋعا مۇمكىندىك بەرەدى.
«مەنىڭ ويىمشا, بىزدە ورتاق قۇندىلىقتار كوپ جانە دۇرىس باعىتتا كەلە جاتىرمىز. ۋنيۆەرسيتەتتە وزگەرىس پەن شىعارماشىلىقتى ىنتالاندىراتىن وسىنداي شىعارماشىلىق ورتانىڭ بولۋى وتە كەرەمەت. ءبىز قازىر مەديانارىقتىڭ بارلىق سۇرانىستارىن قاناعاتتاندىرۋ ءۇشىن جۇمىس ىستەپ جاتىرمىز», – دەپ تولىقتىردى ەمەن ءال-امري.
«Al Jazeera اپتالىعى» اياسىندا قاتار تەلەارناسىنىڭ ماماندارى MNU حالىقارالىق جۋرناليستيكا مەكتەبىنىڭ ستۋدەنتتەرىنە ءبىر اپتالىق ترەنينگ وتكىزەدى جانە زاماناۋي مەديانىڭ وزەكتى ماسەلەلەرى بويىنشا اشىق دارىستەر توپتاماسىن ۇسىنادى. حالىقارالىق جۋرناليستيكا مەكتەبىنىڭ ستۋدەنتتەرىنە «جاڭالىقتار رەپورتاجى», «داتا جۋرناليستيكا», «ءموبيلدى جۋرناليستيكا», «تسيفرلىق ستوريتەللينگ» جانە «جاڭالىقتار جۇرگىزۋشىسى كۋرستارى» تاقىرىپتارىندا 100 ساعاتتان استام تەوريالىق جانە پراكتيكالىق ساباقتار بەرىلمەك.
باعدارلاما سوڭىندا ستۋدەنتتەر كۋرستىق جوبالارىن قورعايدى جانە Al Jazeera Media Institute سەرتيفيكاتتارىن الادى. MNU باسقارما توراعاسىنىڭ ورىنباسارى ەربولات مۇحامەدجان ترەنينگتىڭ بىرەگەي ەكەنىن اتاپ ءوتتى, سەبەبى مۇندا ستۋدەنتتەر ناقتى كەيستەر بويىنشا تاپسىرمالاردى ورىندايدى.
«ستۋدەنتتەر الەمدىك قۇقىقتىق جاڭالىقتار دەڭگەيىندە قابىلدانعان بارلىق ستاندارتتاردى مەڭگەرۋى كەرەك. مۇنداي حالىقارالىق دەڭگەيدەگى وقىتۋ – قازاقستاندا عانا ەمەس, ورتالىق ازيا وڭىرىندە دە العاش رەت جۇرگىزىلۋدە. جالپى Al Jazeera-نىڭ بىلىكتى جۋرناليستەرى ءبىزدىڭ ستۋدەنتتەرگە وزدەرىنىڭ كاسىبيلىگى مەن تاجىريبەسىمەن بولىسەتىن بولادى, سونداي-اق تاعىلىمدامالار دا قاراستىرىلعان. Al Jazeera مەديا ينستيتۋتى ترەنينگكە قاتىسۋشىلاردى جۇمىسقا شاقىرۋعا دا دايىن ەكەنىن ءبىلدىردى. Al Jazeera تەلەكومپانياسىنىڭ الەم بويىنشا 45 فرونت كەڭسەسى مەن فيليالدارى بار. قازاقستان دا كاسىبي مامانداردى ىزدەۋ جانە كادرلاردى ىرىكتەۋ تۇرعىسىنان وتە قىزىقتى بولىپ وتىر», – دەيدى ەربولات مۇحامەدجان.
ايتا كەتەيىك, قر پرەزيدەنتىنىڭ تەلەراديوكەشەنى – قازاقستاننىڭ ەڭ ءىرى مەدياكومپانيالارىنىڭ ءبىرى, ونىڭ قۇرامىنا Jibek Joly, Silk Way, Silk Way Cinema تەلەارنالارى, قازاقستانداعى ەڭ تاريحي KAZINFORM حالىقارالىق اقپاراتتىق اگەنتتىگى جانە دەرەكتى كينو ورتالىعى كىرەدى.
Al Jazeera تەلەكومپانياسى – 1996 جىلى قاتار ءامىرىنىڭ جارلىعىمەن قۇرىلعان حالىقارالىق تەلەكومپانيا. تەلەكومپانيا الەمنىڭ كوپتەگەن ەلدەرىندە اراب جانە اعىلشىن تىلدەرىندە حابار تاراتادى, 50-دەن استام شەتەلدىك بيۋرولارى بار. Al Jazeera Documentary ارناسىندا دەرەكتى كونتەنت كورسەتىلەدى.
