كۇندە كەشكىلىك كىشكەنتاي قىزىم ەكەۋمىز اۋلاداعى بالالارعا ارنالعان ويىن الاڭىندا ءبىر-ەكى ساعات ۋاقىتىمىزدى وتكىزەمىز. ارينە, ءبىزدىڭ ءۇيدىڭ اۋلاسىنداعى ويىن الاڭى سونشالىقتى ۇلكەن ەمەس. قاراپايىم عانا. ءبىر-ەكى اتكەنشەك, تاعى ءبىر جاساندى توبەشىكتەن سىرعاناۋ ويىن قۇرالى جانە بىلقىلداق قۇم توگىلگەن. بار بولعانى وسى. سپورتتىق الاڭ جوق. سوعان قاراماستان سول ماڭايدا تۇراتىن بالالاردىڭ بارلىعى جينالىپ, ويىننىڭ كورىگىن قىزدىرىپ جاتادى. سىرتىنان قاراپ تۇرىپ قىزىعاسىز.
راسى كەرەك, استاناداعى كوپ قاباتتى تۇرعىن ءۇي اۋلالارىندا سپورت جانە ويىن الاڭدارى كوبىرەك سالىنۋدا. جانە ولار ۋاقىت تالابىنا ساي ەرەكشە ءبىر اسەمدىكپەن بوي كوتەرۋدە. بۇل دا تۇرعىندار ءۇشىن ءبىر جاعىنان مادەنيەتتىلىكتىڭ, ەكىنشىدەن, سالاۋاتتى ءومىر سالتىن قالىپتاستىرۋدىڭ بەلگىسى بولماق. ادامدار قالاداعى سپورت زالدارىنا اعىلماي, بوس ۋاقىتتارىن ءوز اۋلاسىندا وتكىزە الادى.
بۇگىنگى تاڭدا ءبىر عانا الماتى اۋدانىندا 581 اۋلا تىركەلگەن. سونىڭ 172 اۋلاسىندا سپورت الاڭدارى بوي كوتەرگەن. ونىڭ 111-ءى فۋتبولعا ارنالسا, قالعاندارى ءتۇرلى ويىن الاڭدارى دەسەك بولادى.
– بيىل ءبىزدىڭ اۋداندا جوبا بويىنشا 4 سپورت الاڭىن سالۋ جوسپارلانعان. ولار م. عابدۋللين, ق. رىسقۇلبەكوۆ, ق. ساتپاەۆ, جيرەنتاەۆ كوشەلەرىندە بوي كوتەرمەك. ونىڭ سىرتىندا 10 سپورت جانە ويىن الاڭىنا جوندەۋ جۇمىستارى جۇرگىزىلەدى. سونداي-اق, ءار اۋلاعا ورىندىقتار مەن قوقىس جاشىكتەرى, دەكوراتيۆتى قورشاۋلار قويىلدى. ولاردىڭ بارلىعىن پاتەر يەلەرى كووپەراتيۆىنىڭ ماماندارى قاداعالايدى. سوندىقتان وسى شارالاردىڭ بارلىعى تۇرعىنداردىڭ يگىلىگى ءۇشىن جاسالۋدا, – دەيدى الماتى اۋداندىق اباتتاندىرۋ ءبولىمىنىڭ باس مامانى نۇربول ايتبەكوۆ.
جالپى, وسىنداي ىزگىلىكتى شارالارعا, اسىرەسە, ەلوردا تۇرعىندارى ءدان ريزا. كانيكۋل كەزىندە بالالار ءوز اۋلاسىندا وينايدى. ءبىر جاعىنان اتا-انانىڭ كوزىنەن تاسا بولمايدى. وسى ورايدا ءبىز باس قالا تۇرعىندارىنىڭ دا پىكىرىن بىلگەن ەدىك.
استانانىڭ سول جاعالاۋىنداعى ساۋران كوشەسىندەگى 5-ءشى ۇيدە تۇراتىن بولات بەركىمبايۇلى ەسىمدى ازامات ءبىزدىڭ سۇراعىمىزعا اقتارىلا جاۋاپ بەردى.
– ءبىزدىڭ ءۇيدىڭ اۋلاسى قازىرگى زامان تالابىنا ساي اباتتاندىرىلعان. ارنايى فۋتبول الاڭى بار, وندا بالالارعا ارنالعان سپورتتىق جابدىقتار ورناتىلعان. ۆەلوسيپەد جولدارى دا ۇمىت قالماعان. كىشكەنتاي بالالار وينايتىن جاساندى سىرعاناۋىش توبەشىكتەر, ۇيشىكتەر, تارتىلاتىن ارقاندار, اتكەنشەكتەر جانە باسقا دا جابدىقتار ءاردايىم كوڭىلدى دۋمانعا بولەنىپ جاتادى. «تۇرمىس» پاتەر يەلەرى كووپەراتيۆىنىڭ قىزمەتكەرلەرى اۋلانى كۇتىپ ۇستاۋ, جابدىقتاۋ جۇمىستارىن ۇنەمى جۇرگىزىپ وتىراتىندىقتان, سىنعان نەمەسە قۇلاپ جاتقان قۇرىلعىلاردى كورمەيسىڭ, – دەسە, كۇلتوبە كوشەسىندەگى «ەۆەرەست» تۇرعىن ءۇي الابىنىڭ تۇرعىنى گۇلنازيا يبراەۆا دا وسى ويدا ەكەن.
– تۇرعىن ءۇي اۋلاسىندا بالا ويناتۋعا وتە ىڭعايلى ويىن الاڭى جاسالعان. ءوزىم دە سول جەردە قولىم بوس كەزدە بالالارىمدى ويناتامىن. ولار جالىقپاي وينايدى. ەكى-ءۇش ساعاتتىڭ قالاي ءوتىپ كەتكەنىن بىلمەي قالامىز. مەنىڭ قىزىما قۇمدا ءارتۇرلى مۇسىندەر جاساپ ويناعان ۇنايدى. اۋلادا بالا كوپ. ۇلكەندەرگە دە جاقسى.ءتىپتى, ترەناجەر زالدارىنا بارىپ, ۋاقىت, قارجى كەتىرىپ اۋرە بولمايسىڭ, ترەناجەر قۇرىلعىلارىنىڭ 10 شاقتى ءتۇرى ورناتىلعان. فۋتبول جانە باسكەتبول ويناۋعا دا مۇمكىندىك بار. وسىنداي جاعداي جاساعان قالالىق اكىمدىك پەن مەن پاتەر يەلەرى كووپەراتيۆىنىڭ توراعاسى بولات ابەنوۆكە العىسىمىز شەكسىز, – دەيدى ول.
قىسقاسى, جىل سايىن كوركەيىپ, قۇلپىرىپ كەلە جاتقان ەلوردامىزدا سپورت جانە ويىن الاڭدارى ءار تۇرعىن ءۇيدىڭ اۋلاسىندا ورىن تەپسە نۇر ۇستىنە نۇر بولماق.
ازامات ەسەنجول
