استانادا Disney ستۋدياسىنىڭ «اليسا اينانىڭ ارعى بەتىندە» انيماتسيالىق ءفيلمى كورەرمەنگە جول تارتتى. ءيا, ءيا, بۇل تەك ءمۋلتفيلمنىڭ تارجىمالانعان اتاۋى عانا ەمەس. ەرەكشەلىگى سول, جۇرتشىلىق كينونىڭ الەمدىك پرەمەراسىن قازاق تىلىندە تاماشالادى.
بۇل – «بولاشاق» قاۋىمداستىعىنىڭ باستاماسىمەن قازاقشالانعان ون بەسىنشى تۋىندى. 2011 جىلدان جالعاسىپ كەلە جاتقان ءىس «ماڭگىلىك ەل» يدەياسىن جۇزەگە اسىرىپ, قازاق ءتىلىنىڭ مارتەبەسىن كوتەرىپ, ونىڭ قولدانىس اياسىن كەڭەيتۋدە.
گولليۆۋد كارتيناسىن قازاق تىلىنە دۋبلياج جاساعان رەجيسسەر – ايجان ءجامشيتوۆا. دۋبلياج ەلوردالىق «Aray Media Group» ستۋدياسىندا جۇرگىزىلدى. ال اقتىق دۋبلياج جۇمىستارى لوندونداعى «Shepparton» ستۋدياسىندا جازىلدى. كەيىپكەرلەردى دىبىستاۋعا استانالىق اكتەرلەر اتسالىستى. اتاپ ايتساق, ەسسىز قالپاقشى تاررانت حايتوپتى – داۋرەن سەرعازين, ۋاقىتتى – نارتاي ساۋدانبەكۇلى, اق پاتشايىم ميرانانى – ءساندى قارشالوۆا, ونىڭ اپكەسى يراتسەبەتانى – اينۇر بەرمۇحامەدوۆا, اق قويان ماكتۆيسپتى – بەيبىت قۇسانباەۆ, سۇر قويان تەكەريدى – شاح-مۇرات ورداباەۆ دىبىستادى. اكتەرلەردىڭ داۋىستارى ءوزىنىڭ كەيىپكەرىمەن ۇندەسىپ, مىنەزىن اشا ءتۇستى.
ءفيلمنىڭ الدىن-الا كورسەتىلىمىندە اكتەرلەردىڭ اتىنان نارتاي ساۋدانبەكۇلى ءسوز سويلەدى:
– مەن بۇگىندە «قازاقتىڭ ءتىلى دامىسىن, قازاقتىڭ ءتىلى وركەندەسىن!» دەگەن جاي عانا جالاڭ ءسوز ەمەس, ناعىز ءىس-ارەكەتتىڭ كۋاسى بولىپ تۇرمىن. وكىنىشكە قاراي, ءبىز كوپتەگەن تۋىندىلاردى تەك ورىسشا كورۋگە ۇيرەنىپ قالدىق. قازاق ءتىلىن ۇلكەن ەكرانعا الىپ شىققانىمىز, جەتىستىك. بۇدان دا اۋقىمدى جوبانى قولعا الساڭىزدار, اكتەرلەر قاۋىمى ارقاشان جانكەشتىلىكپەن جۇمىس ىستەۋگە ءازىر.
«اليسا اينانىڭ ارعى بەتىندە» شىتىرمان وقيعالى ءفيلمى كورەرمەندى ليۋيس كەررولل قالامىنان شىققان سۇيىكتى كەيىپكەرلەرمەن قايتا قاۋىشتىرادى. دوسى ەسسىز قالپاقشىنى قۇتقارۋ ءۇشىن اليسا ۋاقىت كەڭىستىگىنە ساپار شەگەدى. كەيىپكەر قىز كۇتپەگەن عاجايىپ وقيعالاردى باستان كەشەدى. وتباسىلىق قۇندىلىقتاردى ءدارىپتەيتىن Disney بۇل جولى دا ءوز يدەياسىنان اينىعان جوق.
«وتكەندى وزگەرتە المايسىز, بىراق ودان عيبرات الۋعا بولادى», «ۋاقىتتان وزامىن دەمە, ءبارىبىر قۋىپ جەتەدى» سىندى جاۋىر بولعان سوزدەرگە ءمان كىرەدى. جالپى, مۋلتفيلم قۇلاق قۇرىشىن قاندىراتىن قازاق تىلىندەگى ساپالى اۋدارما قاتارىن تولىقتىردى.
گۇلدانا تالعاتقىزى
