استانا قالاسى اكىمدىگىنىڭ ۇيىمداستىرۋىمەن مەملەكەت باسشىسىنىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى بيىلعى جولداۋىن ءتۇسىندىرۋ ماقساتىندا رەسپۋبليكالىق اقپاراتتىق توپ مۇشەلەرىنىڭ وقۋ ورىندارى مەن ەڭبەك ۇجىمدارىمەن, زيالى قاۋىم وكىلدەرىمەن جانە قالالىق ءماسليحات دەپۋتاتتارىمەن كەزدەسۋى ءوتتى.
جيىنعا استانا قالاسى اكىمىنىڭ ورىنباسارى ەرمەك امانشاەۆ, ۇلتتىق ەكونوميكا ءمينيسترىنىڭ ءبىرىنشى ورىنباسارى رۋسلان دالەنوۆ, ءبىلىم جانە عىلىم ۆيتسە-ءمينيسترى اسحات ايماعامبەتوۆ, قارجى مينيسترلىگىنىڭ ىشكى اۋديت كوميتەتىنىڭ توراعاسى ازامات احمەتوۆ, سىرتقى ىستەر مينيسترلىگى حالىقارالىق اقپارات كوميتەتىنىڭ توراعاسى تالعات جۇماعۇلوۆ, ستراتەگيالىق زەرتتەۋلەر ينستيتۋتى ديرەكتورىنىڭ ورىنباسارى سانات كوشكىمباەۆ, «جاينا, استانا» قوعامدىق بىرلەستىگىنىڭ توراعاسى مۇحتار ەركەتاەۆ قاتىستى. العاشقى بولىپ ءسوز العان ەرمەك امانشاەۆ جولداۋدىڭ استانا قالاسىنا قانداي وزگەرىستەر مەن جاڭالىقتار اكەلەتىنىن اتاپ ءوتتى.
– الداعى بەس جىلدا 37 جاڭا مەكتەپ پەن 10 قوسالقى قۇرىلىس اياقتالاتىن بولادى. سونىڭ ىشىندە 4 نىسان وسى جىلدىڭ سوڭىنا دەيىن پايدالانۋعا بەرىلەدى. ال كەلەر جىلدىڭ اياعىنا دەيىن تاعى دا 14 نىساندى پايدالانۋعا بەرۋ كوزدەلىپ وتىر. بۇل مەكتەپتەر قازىرگىدەي 1200 ورىندىق ەمەس, 2500-3000 بالاعا ارنالعان, كەڭەيتىلگەن ستاندارتتارمەن سالىنادى. وسىنىڭ ناتيجەسىندە ءۇش اۋىسىمدى مەكتەپتەر سانى دا بارىنشا ازايادى. استانادا ءبىرىنشى رەت ءبىلىم بەرۋدى جاڭالاندىرۋ ورتالىعىنىڭ بازاسى شەڭبەرىندە مەملەكەتتىك جانە جەكەمەنشىك بالاباقشا تاربيەشىلەرىنىڭ بىلىكتىلىگىن ارتتىرۋ, مەتوديكالىق كومەك كورسەتۋ جۇمىستارى باستالدى. بۇل جۇمىستارعا قالا بيۋدجەتىنەن 350 ميلليون تەڭگەدەن ارتىق قاراجات ءبولىندى. قازىردىڭ وزىندە 1500-دەن اسا تاربيەشى وسىنداي بىلىكتىلىگىن ارتتىرۋ كۋرستارىنان ءوتكىزىلدى. ال كادرلاردى ساپالى دايىنداۋ ماقساتىندا بيىل 13 جوعارى وقۋ ورنىنا مىڭنان اسا گرانت ءبولىندى, – دەگەن ول مەديتسينالىق كومەك كورسەتۋ ساپاسىن ارتتىرۋ ماقساتىندا جىل سوڭىنا دەيىن مەديتسينا سالاسىندا تولىقتاي قاعازسىز جۇمىس ىستەۋ ادىسىنە كوشەتىنىن, كەلەر جىلى تاعى دا 5 ەمحانانىڭ سالىناتىنىن اتاپ ءوتتى. – بۇل ەمحانالار كەزەكتى ازايتادى. ناقتىراق ايتقاندا, ءبىر دارىگەرگە قارالاتىنداردىڭ سانىن 1700-1800 ادامعا دەيىن قىسقارتادى. ال بۇگىنگى تاڭدا بۇل سان 2200-ءدى قۇراپ وتىر. سونىمەن قاتار, وسى جىلدىڭ اياعىنا دەيىن تاعى دا 48 ۋچاسكە اشۋ جوسپاردا بار. سونداي-اق جيىن بارىسىندا كاسىپكەرلىكتى دامىتۋ باعىتىنداعى شارالار تۋرالى دا ءسوز بولدى.
