كۇرەسسىز تويدىڭ ءسانى كەم
ۇلىستىڭ ۇلى كۇنىن استانا ىرگەسىندەگى پريگورودنىي تۇرعىن الابىنىڭ حالقى كوتەرىڭكى كوڭىل-كۇيمەن تويلادى. استانا حالىقارالىق اۋەجايى مەن وسى ماڭداعى مەكەمەلەر مەن ۇيىمدار, كاسىپورىندار ۇجىمدارى اتسالىسقان دۋمان كۇن ارقان بويى كوتەرىلگەننەن باستالدى. «حوزيايۋشكا» دۇكەنىنىڭ الدىنداعى الاڭقايدا ۇيىمداستىرىلعان مەرەكەگە تۇرعىندار كوپتەپ جينالدى.
تويدى بولات قاجى بايپاقباەۆ اق باتاسىمەن اشتى. «جىلقى جىلى ەلىمىزگە باق-بەرەكە, مولشىلىق اكەلسىن. ءار كۇنىمىز ىزگىلىككە, جەرىمىز ىرىسقا تولى بولسىن. قىدىر اتا ءبارىمىزدى قولداسىن» دەپ اقجارما تىلەگىن جەتكىزگەن قاريا تۇرعىن الاپتا ۇلكەن مەشىتتىڭ ىرگەسى قالانا باستاعانىن سۇيىنشىلەدى.
دۋماندى توي بارىسىندا ەسىل اۋدانى اكىمىنىڭ ينسپەكتورى رۋسلان قوناقباەۆ پەن استانا حالىقارالىق اۋەجايى باسقارما توراعاسىنىڭ ورىنباسارى رادىلبەك ءاديمولدا ءسوز سويلەدى. مەرەكەلىك كەش №24 ورتا مەكتەپتىڭ كونتسەرتىمەن جالعاستى. ونەرلى جەتكىنشەكتەر حالىق اندەرىن ايتىپ, «قارا جورعا» بيلەدى.
الاڭقايدىڭ تورىنە تىگىلگەن ءۇش اق شاڭقان كيىز ءۇي مەرەكەنىڭ اجارىن اشىپ تۇر. كوپشىلىك اق جاۋلىقتى اجەلەردىڭ قولىنان ءدام اۋىز ءتيىپ, ناۋرىز كوجە ءىشتى. قاز-قاتار ءتىزىلىپ, توعىزقۇمالاق تاقتاسىندا ءباس سىناعان بۇلدىرشىندەر مەرەكەنىڭ اجارىن اشا تۇسكەندەي. ۇلتتىق زياتكەرلىك ويىنىمىزعا تومەنگى سىنىپ وقۋشىلارى دا قىزىعا, قۇلشىنا كىرىسكەنى كوڭىل كونشىتەدى.
پالۋان بابانىڭ ۇرپاعى ەمەسپىز بە؟
كۇرەسسىز تويدىڭ ءسانى كەم. ءارتۇرلى جاستاعى جىگىتتەردىڭ بوزكىلەمدەگى ايقاستارى كوپشىلىكتىڭ دەلەبەسىن قوزدىرىپ, «ءاپ, بارەكەلدى!» دەگىزدى. انە, مەيرامبەك ەسىمدى قۇرىش بىلەكتى پالۋاننىڭ جاۋىرىنى جەر يىسكەر ەمەس. قارسىلاسىن تاعى جەر قاپتىردى.
ىزعارى قايتپاعان كۇننىڭ سۋىقتىعىنا قاراماي اسىق اتقان بالالار باسقا قىزىقتى ەلەر ەمەس. قارا دومالاقتاردىڭ قاتارىنداعى ەرقانات مىلتىقبايدى اڭگىمەگە تارتقان ەدىك. «اسىققا قۇمارتاتىن سىنىپتاستارىم كوپ. اندا-ساندا جينالىپ وينايمىز. مەن اۋىلعا بارعاندا اجەمنىڭ جيناپ قويعان اسىقتارىن الىپ كەلگەنمىن. بىراق كوپ بالادا اسىق بولا بەرمەيدى» دەيدى ول.
مەرەكەگە جينالعان كوپشىلىكتىڭ قازاقشا كيىنگەنى جاراسىمىن تاپقان. وسى ماڭداعى دۇكەندەردىڭ ساتۋشىلارى دا ۇلتتىق كيىم كيىپ, ساۋدانىڭ كورىگىن قىزدىرۋدا.
اسحات رايقۇل