استانا قالاسى ءماسليحاتىنىڭ كەزەكتى سەسسياسىندا قالا اكىمىنىڭ ورىنباسارى اندرەي لۋكين ءماسليحاتتىڭ 2015 جىلعى 11 جەلتوقسانداعى «استانا قالاسىنىڭ 2016-2018 جىلدارعا ارنالعان بيۋدجەتى تۋرالى» شەشىمىنە وزگەرىستەر مەن تولىقتىرۋ ەنگىزۋ تۋرالى ۇسىنىس جاسادى.
قالا اكىمىنىڭ ورىنباسارى ا.لۋكين ەلوردانىڭ ەكونوميكالىق جانە الەۋمەتتىك دامۋىنىڭ نەگىزگى كورسەتكىشتەرىنىڭ دامۋىنا بايلانىستى قالا بيۋدجەتىن قوسىمشا 12 ملرد 223 ملن تەڭگەگە ۇلعايتۋدى ۇسىندى. بۇل قاراجات ەلىمىزدىڭ باس قالاسىن دامىتۋعا باعىتتالعان مىندەتتەردى جۇزەگە اسىرۋعا جۇمسالىپ, قارجى وپەراتورلارى بولىپ تابىلاتىن باسقارمالارعا بولىنەتىنىن ايتتى.
قارجىنىڭ كەلەسى ءبىر بولىگى ەسىل وزەنىنىڭ جاعالاۋىن اباتتاندىرۋعا, بىرقاتار الەۋمەتتىك ماڭىزى بار عيماراتتاردى كۇردەلى جوندەۋگە جۇمسالماق. قالانىڭ كولىك ينفراقۇرىلىمدارىن دامىتۋعا, جولداردى جوندەۋگە جانە الەۋمەتتىك ماڭىزى بار باعىتتاردى سۋبسيديالاۋعا دا بيۋدجەتتەن قارجى بولىنبەك. قوسىمشا بولىنەتىن قاراجاتتىڭ كەلەسى ءبىر بولىگى – جەكە يەلىكتەردەگى جەر تەلىمدەرىن مەملەكەت قاجەتتىلىگىنە الۋ ءۇشىن قاراستىرىلىپ وتىر.
قارجى بولىنەتىن بۇدان باسقا دا سالالاردى سارالاي كەلە بايانداماشى اندرەي لۋكين اتالعان وزگەرىستەردى قامتىعاندا 2016 جىلعى استانا بيۋدجەتى 352 ملرد 776 ملن تەڭگەنى قۇرايتىنىن ايتتى.
سەسسيانىڭ كۇن تارتىبىنە قاراي جولاۋشىلار كولىگى باسقارماسىنىڭ باسشىسى ەدىل سۇلەيمەنوۆ استانا قالاسى ءماسليحاتىنىڭ 2012 جىلدىڭ 6 ماۋسىمداعى «استانا قالاسىنىڭ الەۋمەتتىك ماڭىزدى باعىتتارىنىڭ تىزبەسىن بەكىتۋ تۋرالى» شەشىمىنە وزگەرىستەر مەن تولىقتىرۋلار ەنگىزۋ تۋرالى ماسەلەنى دەپۋتاتتار تالقىسىنا سالدى. سونىمەن قاتار, باسقارما باسشىسى استانالىق جانە قالا ماڭى باعدارلارىنا جولاۋشىلار مەن جۇكتى اۆتوموبيل كولىگىمەن تۇراقتى تاسىمالداۋ تاريفتەرىن كەلىسۋ تۋرالى باياندادى.
وسى سەسسيانىڭ جۇمىسى بارىسىندا استانا قالاسىندا جەر ۋچاسكەلەرىن بەرۋ جونىندەگى كوميسسيانىڭ قۇرامى بەكىتىلدى.
سەسسيا جۇمىسىنىڭ سوڭىندا كۇن تارتىبىنە قويىلعان شەشىمدەردى نەگىزگە الا وتىرىپ, ءماسليحات دەپۋتاتتارى قولدايتىندارىن ءبىلدىرىپ, داۋىس بەردى.
ايگۇل ۋايسوۆا
