بۇرناعى كۇنى قازاقستاننىڭ ورتالىق كوممۋنيكاتسيالار قىزمەتىنىڭ بريفينگىنە كەلگەن پارلامەنت ءماجىلىسىنىڭ ەكولوگيا جانە تابيعاتتى پايدالانۋ كوميتەتىنىڭ مۇشەسى ەگور كاپپەل جاڭادان قۇرىلعان تۇتىنۋشىلار قۇقىن قورعاۋ اگەنتتىگىنە قولداۋ كورسەتۋ جونىندە ايتتى.
ونىمەن بىرگە بريفينگكە قاتىسقان ارىپتەستەرى روزاقۇل حالمۇرادوۆ, رومان كيم, نادەجدا نەستەروۆا, احمەت مۇرادوۆ اسسامبلەيادان پارلامەنتتىڭ تومەنگى پالاتاسىنا سايلانعانداردىڭ ماقسات-مۇراتتارىنا توقتالدى.
دەپۋتات روزاقۇل حالمۇرادوۆتىڭ ايتۋىنشا, قازاقستان حالقى اسسامبلەياسى رەسەي لينگۆيسى دميتري پەتروۆتىڭ ادىستەمەسى نەگىزىندە «ءتىل دارىن» باعدارلاماسىن ەنگىزگەن. ال, قازاقستانداعى كورەيلەر قاۋىمداستىعى بالاباقشادا قازاق ءتىلىن ۇيرەتەتىن جوبانى جاساعان. ءازىر بۇل جوبا الماتى قالاسىنىڭ بالاباقشالارىندا سىناقتان ءوتىپ جاتقان كورىنەدى.
وسىدان 7-8 جىل بۇرىن قازاقستان وزبەكتەرىنىڭ دوستىق قاۋىمداستىعى وزبەك تىلىندە ساباق وتەتىن مەكتەپتەردەگى كەيبىر پاندەردى قازاق تىلىندە وقىتۋ جوباسىن ەنگىزدى. قازىر وزبەك مەكتەپتەرىندە قازاقستان تاريحى ءپانى قازاق تىلىندە وقىتىلادى ەكەن. جوبا ەنگەننەن كەيىن 3-4 جىل وتكەن سوڭ سول مەكتەپ تۇلەكتەرىنىڭ 85 پايىزى مەملەكەتتىك گرانتقا يە بولا باستاعانىن كورىپ, اسسامبلەيا اتىنان دەپۋتاتتىققا سايلانعاندار وسى جوبانى ءبىلىم جانە عىلىم مينيسترلىگىنە ۇسىنعان. الايدا, مينيسترلىك مۇنىڭ ەنگىزىلۋىن 2015 جىلعا ىسىرىپ قويعان. سونداي-اق, 2015 جىلدان باستاپ ۇبت تاپسىرعان وزگە تىلدە وقىتاتىن مەكتەپ تۇلەكتەرىنىڭ قازاق ءتىلى پانىنەن العان باللدارى ەسەپكە الىناتىن بولدى. روزاقۇل ساتىبالدىۇلى دەپۋتاتتىق ساۋال جولداپ, ءبىلىم جانە عىلىم مينيسترلىگىنەن وسىنداي جاۋاپ العان.