جاڭا مودەل جاڭا مىندەتتەر جۇكتەيدى
بۇرناعى كۇنى قازاقستاننىڭ ورتالىق كوممۋنيكاتسيالار قىزمەتىنىڭ جىل قورىتىندىلارىنا ارنالعان بريفينگتەر توپتاماسى باستالىپ, وعان قاتىسقان پرەزيدەنت اكىمشىلىگى باسشىسىنىڭ ورىنباسارى عابيدۋللا ءابدىراحىموۆ پەن مەملەكەتتىك قىزمەت ىستەرى اگەنتتىگىنىڭ توراعاسى ءاليحان بايمەنوۆ مەملەكەتتىك قىزمەتتىڭ جاڭا مودەلى بويىنشا كادرلاردى ىرىكتەۋ جانە جوعارىلاتۋ قاعيداتتارىمەن تانىستىردى.
مەملەكەتتىك قىزمەتكەرلەر بيىل «ا» جانە ب» كورپۋسىنا بولىنگەنى بەلگىلى. «ا» كورپۋسىنا ەنشىلى 540 جوعارى لاۋازىمدى قىزمەتكە تۇرۋ ءۇشىن 2024 ءوتىنىش كەلىپ تۇسكەن ەكەن. بىلىكتىلىك تالاپتارى بويىنشا 1851 ۇمىتكەر تەستىلەۋگە قاتىسىپ, قورىتىندىسىندا 1122 ادام اڭگىمەلەسۋگە جىبەرىلگەن. سونىڭ ناتيجەسىندە «ا» كورپۋسى 30 پايىزعا جاڭارتىلىپ, ولارمەن 4 جىلعا ەڭبەك كەلىسىمشارتى جاسالدى. وسىنداي ستاتيستيكامەن تانىستىرعان عابيدۋللا ءابدىراحىموۆ ەلباسى نۇرسۇلتان نازارباەۆتىڭ «ا» كورپۋسىنا وتكەندەرگە جۇكتەگەن مىندەتتەر لەگىنە توقتالدى.
ورتالىق جانە جەرگىلىكتى اتقارۋشى ورگاندار اراسىندا ۋاكىلەتتىكتەردىڭ ءبولىنىپ, ناتيجەسىندە جەرگىلىكتى اتقارۋشى ورگاندار قوسىمشا ۋاكىلەتتىككە, ينفراقۇرىلىمدار مەن قارجىعا جانە كادرلارعا يە بولدى. الەۋمەتتىك, اكىمشىلىك جانە كوممۋنالدىق قۇرىلىمدار بويىنشا اۋىل اكىمدەرىنە 67 فۋنكتسيا بەلگىلەنىپ بەرىلگەن. سونىمەن بىرگە, پرەزيدەنت اكىمشىلىگى جەتەكشىسىنىڭ ورىنباسارى تامىز ايىندا وتكەن اۋىل اكىمدەرىنىڭ سايلاۋى قازاقستان ءۇشىن ۇلكەن سىناق پەن تاجىريبە بولعانىن, جالپى, بيىل ەلباسىنىڭ جارلىعىمەن ءتۇرلى دەڭگەيدەگى اكىمدەردىڭ حالىق الدىندا ەسەپ بەرۋ ءتارتىبىنىڭ وزگەرگەنىن ايتتى.
قازاقستانداعى مەملەكەتتىك قىزمەتتىڭ جاڭا مودەلىن الىس-جاقىن شەتەلدەر جوعارى باعالاعانىن ايتقان ءاليحان بايمەنوۆ ونىڭ ارتىقشىلىقتارى جونىندە اڭگىمەلەدى.
امانعالي قالجانوۆ