قوعامدىق كومەكشىلەر بەلسەندى

قالا تۇرعىندارى كەز كەلگەن بۇزاقىلىققا بەيجاي قاراماۋ كەرەك. اسىرەسە, حالقىنىڭ سانى كۇننەن كۇنگە كوبەيگەن استانا ءۇشىن ەرىكتى كومەكشىلەردىڭ قولعابىسى كەرەك-اق. بۇگىندە ىشكى ىستەر دەپارتامەنتى جەرگىلىكتى پوليتسيا قىزمەتىمەن قويان-قولتىق جۇمىس ىستەپ كەلە جاتقان 900-دەن اسا ازامات بار.

پوليتسيا قىزمەتكەرلەرىنە كومەك­تەسىپ جۇرگەن قالا تۇرعىندارىنىڭ اراسىندا ستۋدەنت جاستاردان قۇرال­عان 217 جەدەل ساقشى مەن كونسەرج, 343 مەملەكەتتىك ەمەس كۇزەت قۇرىلىمدارىنىڭ قىزمەتكەرى, ءتىپتى, 40-قا جۋىق ارداگەر دە بار.
2016 جىلدىڭ العاشقى ءۇش ايىنداعى قورىتىندى بويىنشا وسى قوعامدىق كومەكشىلەردىڭ كومەگىمەن 4 قىلمىس جانە 165 اكىمشىلىك قۇقىق بۇزۋشىلىق انىقتالىپ, 210 ازامات ۋچاسكەلىك پوليتسيا پۋنكتىنە جەتكىزىلىپتى.
ەرىكتى كومەكشىلەردىڭ ىشىندە تالاي ادامنىڭ ءومىرىن قۇتقارىپ, مۇلىكتى امان الىپ قالعاندار دا بارشىلىق. مىسالى, ءمادينا جۇمابەكوۆا اتتى قالا تۇرعىنى كوپقاباتتى تۇرعىن ۇيدەگى اشىق تەرەزەنىڭ شەتىندە وتىرعان بالانى بايقاپ قالادى. ول بىردەن پوليتسياعا حابارلاسىپ, 4 جاستاعى بالدىرعاننىڭ ءومىرىن قورعاپ قالدى.
استانادا تۇراتىن تاڭشولپان قالىبايدىڭ مالىمەتى بويىنشا, كامەلەتتىك جاسقا تولماعان ءۇش ستۋدەنتتەن ناركوتيكالىق زاتتار تاركىلەنگەن. سونداي-اق, گۇلنازيرا بالتاباەۆا مەن باعلان بايسۇلتانوۆ اتتى ازاماتتاردىڭ ارقاسىندا ناركوتيكالىق زاتتارى بار ەكى ادام ۇستالدى.
ال پيك توراعاسى اسان يسكاحوۆ ساۋدا ورتالىعىندا تۇرعان تەرمينالدى كوتەرىپ اكەتىپ بارا جاتقان ەكى كۇدىكتى ازاماتتى بايقاپ, تەرمينال يەسىنە قوڭىراۋ سوعۋ ارقىلى قوندىرعىنى امان الىپ قالدى.
مىنە, وسى سەكىلدى مىسالداردى كوپتەپ كەلتىرۋگە بولادى.
جەرگىلىكتى پوليتسيا قىزمەتى قۇرىلعان­نان باستاپ قوعامدىق كومەكشىلەردىڭ قاتارى ارتقان. ولار ۋچاسكەلىك پوليتسيا ينسپەكتورلارىمەن تىعىز جۇمىس جاساپ, بارلىق قىلمىستار مەن قۇقىق بۇزۋشىلىقتار مالىمەتىن جەتكىزىپ ءجۇر. وسىلايشا, پوليتسيانىڭ ازاماتتىق قوعامداعى سەنىمدى وكىلدەرى قالاداعى ءتارتىپتىڭ تۇراقتالۋىنا ۇلەس قوسۋدا.
ارينە, ولاردىڭ ەڭبەگى ەلەۋسىز قالمايدى. «قوعامدىق ءتارتىپتى كۇزەتۋگە قاتىساتىن ازاماتتار تۋرالى» قر زاڭىنا جانە ۇكىمەتتىڭ ەرەجەسىنە سايكەس, پوليتسيا قىزمەتكەرلەرىنە كومەك كورسەتكەندەر العىس رەتىندە اقشالاي سىيلىقپەن ماراپاتتالىپ تۇرادى.
پوليتسيا قىزمەتكەرلەرى قانشا جەردەن كاسىبي مامان بولسا دا, ولار بارىنە بىردەي جەتە بەرمەيدى. سوندىقتان ءاربىر ادام اينالاسىنداعى, ءوز اۋلاسىنداعى قۇقىق بۇزۋشىلىقپەن كۇرەسىپ, جەرگىلىكتى پوليتسيا قىزمەتىمەن جۇمىلا جۇمىس ىستەگەنى ارتىق بولمايدى.

قىمبات توقتامۇرات