استاناداعى عافۋ قايىربەكوۆ اتىنداعى №2 مەكتەپ-گيمنازياسىندا قاھارمان-پوليتسەي عازيز بايتاسوۆتى ەسكە الۋ ماقساتىندا ميني فۋتبولدان جارىس ءوتتى.
جارىسقا اكىمشىلىك پوليتسيا كوميتەتىنىڭ مەملەكەتتىك كۇزەت قىزمەتى باسقارماسى, استانا قالاسى مامانداندىرىلعان كۇزەت قىزمەتى باسقارماسى, ۇكىمەتتىك مەكەمەلەردى كۇزەتۋ جونىندەگى پوليتسيا پولكى جانە ديپلوماتيالىق وكىلدىكتەردى كۇزەتۋ ءجونىندەگى پوليتسيا پولكى قاتىستى.
ەستەرىڭىزدە بولسا, 2011 جىلدىڭ 12 قاراشاسىندا تاراز قالاسى تۇرعىندارىنىڭ تىنىشتىعىن بۇزىپ, ەلدى ءدۇر ءسىلكىندىرگەن لاڭكەستىك وقيعا ورىن العان ەدى. سول زۇلماتتىڭ سالدارىنان 7 ادام باقيلىق بولدى. ونىڭ ىشىندە قۇقىق قورعاۋ ورگانىنىڭ 5 قىزمەتكەرى مەن 2 قالا تۇرعىنى بار. سول كەزدە بەيبىت حالىققا ءبۇلىك سالعان جانكەشتىنى جانىن پيدا ەتە توقتاتقان عازيز بايتاسوۆ بولاتىن. ەرەن ەرلىگىن ەسكەرىپ, قازاقستان رەسپۋبليكاسى تاۋەلسىزدىگىنىڭ 20 جىلدىعى قارساڭىندا ەلباسىنىڭ جارلىعىمەن جامبىل وبلىستىق ءىىد جول پوليتسياسى جەكە باتالونىنىڭ 1-ءشى ۆزۆود كومانديرى, پوليتسيا كاپيتانى عازيز بايتاسوۆقا حالىق قاھارمانى اتاعى بەرىلگەن ەدى.
«باتىردى ەسكە الۋعا ارنالعان مۇنداي ءىس-شارالار ازاماتتىق رۋحتى كوتەرىپ, كەيىنگى ۇرپاقتىڭ بىلەكتى دە جۇرەكتى بولىپ وسۋىنە سەپتىگىن تيگىزەدى دەپ ويلايمىن», – دەيدى استانا قالاسى مامانداندىرىلعان كۇزەت قىزمەتى باسقارماسى باستىعىنىڭ ورىنباسارى ەلدوس وتەگەنوۆ.
ەربول جانات
