بىلتىر نۇر-سۇلتان قالاسىنىڭ پوليتسيا دەپارتامەنتىنە وتباسىنداعى زورلىق-زومبىلىققا قاتىستى 16 مىڭ شاعىم ءتۇسىپتى. بۇل بىلتىرعى كورسەتكىش دەسەك تە, بيىلعى جاعداي دا كوڭىل كونشىتەرلىكتەي ەمەس. قالالىق ىشكى ىستەر دەپارتامەنتىنىڭ قىزمەتكەرلەرى ءوزىنىڭ وتباسىنا وزبىرلىق كورسەتكەن 730 ەر ادامدى ارنايى تىركەۋگە الىپتى. ولاردىڭ بارلىعى مامانداردىڭ باقىلاۋىندا بولادى.
وزەكتىلىگىن جويمادى
تۇرمىستىق زورلىق-زومبىلىق ماسەلەسى وزەكتىلىگىن جويمايتىنى انىق. ەلوردالىق پوليتسەيلەر كارانتين كەزىندە ستاتيستيكانىڭ ۇلعايىپ, وتباسىنداعى زورلىق-زومبىلىقتىڭ ءورشىپ كەتكەنىن ايتادى. ساندار وزگەرىپ تۇرادى, بىراق ءبىزدىڭ قوعامدا قاتىگەزدىك پەن قىلمىس كوبەيىپ بارا جاتقانىن كورەمىز.
نۇر-سۇلتان قالالىق پوليتسيا دەپارتامەنتىنىڭ ايەلدەردى زورلىقتان قورعاۋ جونىندەگى بولىمشەسىنىڭ اعا ينسپەكتورى گۇلميرا شراحمەتوۆا وسى باعىتتا اۋقىمدى جۇمىستار اتقارىلىپ, دەر كەزىندە تۇرمىستىق زورلىق-زومبىلىقتىڭ الدىن الاتىن ءىس-ارەكەتتەر جاسالىپ جاتقانىن ايتادى.
«2021 جىلدىڭ قورىتىندىسى بويىنشا 8 مىڭعا جۋىق ايەلدى قورعاۋ ۇيعارىمىن تولتىردىق. پوليتسيا ينسپەكتورلارى زورلىق-زومبىلىقتىڭ الدىن الۋ ءىس-شارالارىن وتكىزەدى. نۇر-سۇلتان قالاسى بويىنشا 730 ەر ادام تىركەۋدە تۇر. ولاردى قاتاڭ باقىلاۋدا ۇستايمىز. ويتكەنى ولار قۇقىق بۇزۋعا دايىن تۇراتىن ادامدار ساناتىنا جاتادى. بۇل جۇمىسپەن ىشكى ىستەر مينيسترلىگىنىڭ جانىنان قۇرىلعان انا مەن بالانى جابىرلەۋدەن قورعاۋ جونىندەگى ارناۋلى ءبولىم قىزمەتكەرلەرى اينالىسادى. وتكەن جىلى مەملەكەت باسشىسى قاسىم-جومارت توقاەۆتىڭ تاپسىرماسىمەن بۇل ءبولىم قىزمەتكەرلەرىنىڭ شتاتى كەڭەيتىلدى» دەپ ءتۇسىندىردى گ.شراحمەتوۆا.
قر پرەزيدەنتى جانىنداعى ايەلدەر ءىسى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا توراعاسى ءلاززات رامازانوۆا 2021 جىلدىڭ 25 اقپانىندا ىشكى ىستەر ورگاندارىنداعى ارناۋلى بولىمشەنىڭ جاڭا تاريحىنىڭ پاراقتارى جازىلا باستادى دەپ سانايدى.
«ىشكى ىستەر ورگاندارىندا 1999 جىلى قۇرىلعان ورگاننىڭ وتكەن جىلدىڭ 25 اقپانىنان باستاپ جاڭاشا تاريحى جازىلا باستادى. سەبەبى پرەزيدەنتتىڭ تاپسىرماسىمەن, نەگىزىنەن, ايەلدەر جۇمىس ىستەيتىن وسى قۇرىلىمنىڭ ءرولىن كۇشەيتۋ تۋرالى شەشىم قابىلداندى. قازىر ءبىزدىڭ الدىمىزدا تۇرعان نەگىزگى مىندەت – وتباسىلارداعى تۇرمىستىق زورلىققا الىپ باراتىن بارلىق ءىس-ارەكەتتەردىڭ الدىن الۋ. ويتكەنى ءار وتباسىنداعى بەيبىتشىلىك, تىنىشتىق ورناپ, ءار بالانىڭ ەرتەڭگە دەگەن سەنىمىن نىعايتۋ – بارشامىزدىڭ مۇراتىمىز» دەيدى ول.
پوليتسيا مەن ازاماتتىق قوعامنىڭ دانەكەرى
مەملەكەت باسشىسى قاسىم-جومارت توقاەۆتىڭ 2021 جىلى 25 اقپانداعى ۇلتتىق قوعامدىق سەنىم كەڭەسىنىڭ 5-وتىرىسىندا ىشكى ىستەر مينيسترلىگىنە باعىناتىن ايەلدەر مەن بالالاردى زورلىق-زومبىلىقتان قورعاۋ جونىندەگى ارنايى بولىمشەلەردىڭ قىزمەتىن كۇشەيتۋدى تاپسىرعانى ءمالىم. پرەزيدەنت سول جولعى جيىندا ايەلدەرگە قاتىستى تۇرمىستىق زورلىق-زومبىلىققا وتكىر الەۋمەتتىك پروبلەما رەتىندە توقتالدى.
«جىل سايىن ەلىمىزدە ايەلدەرگە قاتىستى 2,5 مىڭنان استام قىلمىستىق ءىس تىركەلەدى. ونىڭ ىشىندە ادام ولىمىنە الىپ كەلەتىن جاعدايلار دا بار. بۇل وتكىر ماسەلەنى شەشۋ ءۇشىن مەملەكەتتىك ورگاندار مەن ۇكىمەتتىك ەمەس ۇيىمداردىڭ كۇش بىرىكتىرۋى قاجەت. بۇل رەتتە ىشكى ىستەر مينيسترلىگىنە قاراستى 1999 جىلى قۇرىلعان ايەلدەر مەن بالالاردى زورلىق-زومبىلىقتان قورعاۋ جونىندەگى ارنايى بولىمشەلەر ماڭىزدى ءرول اتقارادى. اتالعان بولىمشەلەر پوليتسيا مەن ازاماتتىق قوعامنىڭ اراسىندا دانەكەر بولۋى كەرەك. الايدا كەزىندە ولاردىڭ شتاتتىق سانى, اسىرەسە, تۇرمىستىق زورلىق-زومبىلىق فاكتىلەرى ءجيى تىركەلەتىن ايماقتاردا ەكى ەسەگە دەيىن قىسقارتىلدى. ىشكى ىستەر مينيسترلىگىنە ايەلدەر مەن بالالاردى زورلىق-زومبىلىقتان قورعاۋ جونىندەگى ارنايى بولىمشەلەردىڭ شتاتىن قايتا قالپىنا كەلتىرۋدى تاپسىرامىن» دەدى قاسىم-جومارت توقاەۆ.
بەلسەندى جۇمىس جۇرگىزىلەدى
جاقىندا استانالىق پوليتسيا دەپارتامەنتىندە ايەلدەر مەن بالالاردى زورلىق-زومبىلىقتان قورعاۋ جونىندەگى ارنايى بولىمشە قىزمەتكەرلەرىن قۇتتىقتاۋ ءراسىمى ءوتتى. سالتاناتتى جيىنعا قاتىسقان ۆەدومستۆو باسشىسى, پوليتسيا گەنەرال-مايورى مارات تولەباەۆ ايەلدەرگە گراموتالار مەن العىس حاتتار تاپسىردى. 1999 جىلدىڭ 19 اقپانىندا ءىىو جۇيەسىندە ايەلدەردى زورلىق-زومبىلىقتان قورعاۋ بولىمشەسى قۇرىلدى.
بولىمشە ايەلدەردىڭ كونستيتۋتسيالىق قۇقىقتارىن, بوستاندىقتارى مەن مۇددەلەرىن قۇقىققا قارسى قول سۇعۋشىلىقتان قورعاۋ, زورلىق-زومبىلىق فاكتىلەرىنىڭ الدىن الۋ جانە جولىن كەسۋ, وتباسى-تۇرمىستىق قاتىناستار سالاسىنداعى قۇقىق بۇزۋشىلىقتاردى بولدىرماۋ جانە پسيحولوگيالىق قولداۋ كورسەتۋ ماسەلەلەرىندە ايەلدەرگە قۇقىقتىق كومەك كورسەتۋ ماقساتىندا قۇرىلدى.
2021 جىلعى 19 ناۋرىزدا ىشكى ىستەر ءمينيسترىنىڭ بۇيرىعىمەن وسى بولىمشەنىڭ شتات سانى نىعايتىلدى. قازىرگى ۋاقىتتا ايەلدەردىڭ قوعامداعى جاعدايىن جاقسارتۋدىڭ ءتۇرلى اسپەكتىلەرى بويىنشا بەلسەندى جۇمىس جۇرگىزىلۋدە. سونىڭ ءبىرى – زورلىق-زومبىلىققا قارسى كۇرەس جانە ايەلدەرگە قاتىستى كەمسىتۋشىلىكتىڭ بارلىق ءتۇرىن جويۋ.
ايەلدەر مەن بالالاردى زورلىق-زومبىلىقتان قورعاۋ بولىمشەسىنىڭ قىزمەتكەرلەرى تۇرعىلىقتى جەرى بويىنشا وتباسىلىق جانجالدار ورىن العان ۇيلەرگە بارادى. سول وتباسىلاردا تۇرمىستىق قۇقىق بۇزۋشىلىقتاردىڭ الدىن الۋ ماقساتىندا ەرلى-زايىپتىلارمەن اڭگىمەلەسىپ, پسيحولوگيالىق قولداۋ جانە قۇقىقتىق كومەك كورسەتەدى. سونىڭ ىشىندە سۋيتسيدكە بەيىمدىلىگى بار ايەلدەرمەن اڭگىمەلەسىپ, قۇقىقتىق كەڭەس بەرەدى. بۇدان بولەك, بولىمشە قىزمەتكەرلەرى قوعامدىق ورىنداردا حالىققا اقپاراتتىق-ءتۇسىندىرۋ جۇمىستارىن جۇرگىزىپ, ۇيىمداردا ءدارىس, سەمينار, ترەنينگ, دوڭگەلەك ۇستەل وتكىزەدى. باسقوسۋلاردىڭ بارىندە تۇرمىستىق زورلىق-زومبىلىقتان زارداپ شەككەندەرگە ءىس-قيمىل الگوريتمى بويىنشا اقپاراتتىق پاراقشالار تاراتىلادى. ال ومىرلىك قيىن جاعدايعا تاپ بولعان ايەلدەرگە داعدارىس ورتالىعى كونسۋلتاتسيالىق-اقپاراتتىق كومەك كورسەتەدى.
