ستاتيستيكالىق دەرەكتەرگە سايكەس بۇگىندە استانادا 14 پەن 29 جاس ارالىعىنداعى 220 مىڭ ادام تۇرادى. قالا حالقىنىڭ 22 پايىزىن قۇرايتىن جاستاردىڭ باستامالارىنا بيىل 200 ميلليون تەڭگە ءبولىندى. بۇل تۋرالى قالالىق اكىمدىكتە وتكەن ءباسپاسوز ءماسليحاتىندا جاستار ساياساتى ماسەلەلەرى باسقارماسى باسشىسىنىڭ مىندەتىن اتقارۋشى ەربول رىسپاەۆ مالىمدەدى.
ونىڭ ايتۋىنشا, باسقارمانىڭ ۇيىمداستىرۋىمەن ەلوردادا جىل باسىنان بەرى 25-تەن اسا جوبا, ۇلتتىق جانە وتباسىلىق داستۇرلەردى ناسيحاتتاۋعا, جۇمىسپەن قامتۋ جانە كاسىبي باعدارلاۋعا, سالاۋاتتى ءومىر سالتىنا باۋلىپ, ەرىكتىلەر قوزعالىسىن دامىتۋعا باعىتتالعان 100-گە جۋىق ءىس-شارا وتكىزىلدى. 2017 جىلعا دەيىن تاعى 10 ءىرى جوبانى جۇزەگە اسىرۋ جوسپارلانعان.
– جاسوسپىرىمدەردىڭ شىعارماشىلىعىن جەتىلدىرىپ, بوس ۋاقىتىن ءتيىمدى ۇيلەستىرۋ ءۇشىن قازىرگى كەزدە استانادا 13 اۋلا كلۋبى جۇمىس ىستەيدى. «ەرىكتىلەر مەكتەبىنە» قاتىسۋشىلار دا از ەمەس. «استانا جاستارى» رەسۋرستىق ورتالىعىندا بۇگىندە 1326 ۆولونتەر تىركەلگەن. ولاردىڭ 50 پايىزى اعىلشىن ءتىلىن بىلەدى. ەرىكتىلەر توبى ەكسپو-2017 اۋماعىندا عانا ەمەس, قالامىزداعى بارلىق قوعامدىق, مادەني شارالارعا اتسالىسادى, – دەيدى ەربول رىسپاەۆ.
ال «استانا جاستارى» كمم باسشىسىنىڭ ورىنباسارى جازيرا ەدىگەنوۆانىڭ سوزىنشە, جاستار ايىنا ءبىر رەت كاسىبي باعدارلاۋعا قاتىستى اپتالىق ترەنينگتەن وتەدى. الداعى جىلى ورتالىق ترەنينگتەردىڭ ۇزاقتىعىن ءۇش اپتاعا دەيىن ارتتىرۋدى كوزدەپ وتىر.
سونىمەن بىرگە, جيىندا جاستاردى جۇمىسپەن قامتۋ ماسەلەسى ءسوز بولدى. استانالىق جاستار اراسىنداعى جۇمىسسىزدىق كورسەتكىشى بۇگىندە 5,6 پايىزعا تەڭ. تەحنيكتەر, ليفت جوندەۋشىلەر, تىگىنشى, ەلەكترومونتەر, سانتەحنيك, مەيىربيكە, كرانشى, مۇعالىم سەكىلدى ماماندىقتار جوعارى سۇرانىسقا يە بولىپ وتىر.
ءمادينا جاقىپ
