ەلوردادا جۇمىسسىز جاستاردى سۇرانىستاعى كاسىپتەرگە ۇيرەتەتىن «ءۇش كۇندە مامان اتانۋ» جوباسى ىسكە قوسىلدى.
اتالعان جوبا اياسىندا 18 بەن 29 ارالىعىنداعى جۇمىسى جوق جاستار بۇگىنگى تاڭداعى نارىقتا سۇرانىسقا يە كاسىپ تۇرلەرى, اتاپ ايتساق, اسپاز, مانيكيۋر شەبەرى, شاشتاراز, ماكياج شەبەرى, گرافيكالىق ديزاينەر, SMM مەنەدجەرى جانە ءفوتوتىلشى بولۋدىڭ قىر-سىرلارىن ۇيرەنەدى.
– ماۋسىم ايىنان بەرى ۇيىمداستىرىلىپ جاتقان بۇل جوبا جىل سوڭىنا دەيىن جالعاسادى. وندا ايىنا ەكى رەت جوعارىدا اتالعان كاسىپ تۇرلەرى بويىنشا تەگىن وقىتۋ باعدارلامالارى قامتىلادى. وسى ۋاقىتقا دەيىن ءبىر ءىس-شارانى وتكىزىپ ۇلگەردىك. وندا ەلوردادا تۇراتىن كوپبالالى انالاردى مانيكيۋر ونەرىنە وقىتتىق. نەگە ءبىز مۇنداي كاسىپتەردى تاڭدادىق؟ ويتكەنى قازىرگى كۇنى جوعارى ءبىلىمدى تالاپ ەتەتىن ماماندىقتاردان گورى قانداي دا ءبىر كاسىپتى مەڭگەرگەن تيىمدىرەك بولىپ تۇر. ماسەلەن, كىرپىك نە تىرناق ارلەيتىن ادامدار مەملەكەتتىك قىزمەتكەرلەرگە قاراعاندا الدەقايدا كوبىرەك تابىس تاباتىنى جاسىرىن ەمەس, – دەيدى «استانا جاستارى» رەسۋرستىق ورتالىعىنىڭ جەتەكشىسى شىڭعىس تىلەۋلين.
ايتا كەتەيىك, جوبا شەڭبەرىندە تەگىن شەبەرلىك سىنىپتارى دا وتكىزىلىپ تۇرادى. مىسالى, 10-11 شىلدە ارالىعىندا كۆانتتىق پسيحولوگ بالدىرعان سكاكوۆا جوبا قاتىسۋشىلارىنا ارناپ ءوزىن-ءوزى باعالاۋ جانە اقشا تاقىرىپتارىنا قاتىستى ترەنينگتەر جۇرگىزەدى.
جىل سوڭىنا دەيىن «ءۇش كۇندە مامان اتانۋ» جوباسىنا 200-دەي ەلوردالىق جاس قاتىسادى دەپ جوسپارلانۋدا. سونداي-اق جۇمىسسىز جۇرگەن ءارى جاسى 29-عا دەيىنگى كەز كەلگەن ازامات 57-01-42 تەلەفون ءنومىرى ارقىلى رەسۋرستىق ورتالىققا حابارلاسىپ, اتالعان جوبانىڭ قاتىسۋشىسى بولا الادى.
