نۇر-سۇلتاندا سىبايلاس جەمقورلىقتى جەڭ ۇشىنان جالعاستىرۋعا جاقىن سالالار بەلگىلى بولدى. اسىرەسە, پارا الۋ دەرەگى بويىنشا كوش باسىن قۇقىق قورعاۋ ورىندارى باستاپ تۇر.
سىبايلاس جەمقورلىققا قارسى ءىس-قيمىل اگەنتتىگىنىڭ نۇر-سۇلتان قالاسى بويىنشا دەپارتامەنتى باسشىسى شىڭعىس قابدۋلا وتكىزگەن بريفينگتە جىل باسىنان بەرى 95 قىلمىس تىركەلگەنى ايتىلدى. ونىڭ ىشىندە ۇشەۋى اسا اۋىر, 48-ءى اۋىر جانە 61-ءى – سىبايلاس جەمقورلىق سيپاتىنداعى قىلمىستار.
ال سالاعا قاراي سيپاتتاساق, تىركەلگەن قىلمىستار باسىندا 28 جاعدايمەن قۇقىق قورعاۋ ورىندارىنىڭ قىزمەتكەرلەرى تۇر. مۇنان كەيىن 10 فاكتىمەن دەنساۋلىق ساقتاۋ سالاسى. ەنەرگەتيكا سالاسى بويىنشا – 8, قۇرىلىس سالاسى بويىنشا 6 جاعداي تىركەلگەن.
بارلىعى 47 ادام قىلمىستىق جاۋاپكەرشىلىككە تارتىلدى, ونىڭ ىشىندە 3 رەسپۋبليكالىق جانە 2 قالالىق دەڭگەيدەگى باسشىلىق قىزمەتتەگى ازاماتتار بار, – دەدى بريفينگ بارىسىندا ش.قابدۋلا.
جەمقورلىققا جاقىن تىزىمدە ءبىلىم بەرۋ سالاسى دا بار. وسى جىلى دەپارتامەنت قىزمەتكەرلەرى ءبىر ميلليارد تەڭگە مولشەرىندە قارجى جىمقىرۋ ارەكەتىنىڭ جولىن كەسكەن. «پاندەميا كەزىندە بالالاردى قاشىقتان وقىتۋعا ارنالعان 22 مىڭ 650 پلانشەتتى جەتكىزۋ بويىنشا سوتقا دەيىنگى تەرگەۋ بارىسىندا ميلليارد تەڭگە كولەمىندە قاراجات جىمقىرۋ فاكتىلەرى انىقتالدى. زالال تولىق كولەمدە وتەلدى. ءبىلىم جانە عىلىم مينيسترلىگىنە قىلمىس جاساۋعا ىقپال ەتكەن سەبەپتەر مەن جاعدايلاردى جويۋ تۋرالى ۇسىنىس ەنگىزىلدى» دەدى بريفينگ بارىسىندا دەپارتامەنت باسشىسى.
ون اي ىشىندە تىركەلگەن سىبايلاس جەمقورلىق دەرەكتەرىنە قاتىستى قىلمىستاردىڭ 40 پايىزدان استامى مەملەكەتتىك ورگاندارعا تيەسىلى.
