Өнерлі өрен, Астанадағы №50 Қазғарыш мектеп-лицейінің оқушысы Аслан Амангелдиев Венеция қаласындағы «Orpheus in Italy» халықаралық өнер фестиваліне қатысып, жүлделі екінші орынды иеленді.
Аслан осыған дейін «Ақ көгершін», «Әнші балапан» секілді республикалық байқауларда, Мәскеуде, Түркияда өткен халықаралық фестивальдерде биіктерден көрінді. Ал Италияда әлемнің әр түкпірінен келген жүздеген жас өнерпаздан озды.
Қазылар алқасының құрамында Қазақстаннан Қарлығаш Әбдікәрімова болды. Онымен бірге қатысушыларды бағалаған Ұлыбритания, Германия, Польша, Болгария, Италия, Мальта, Украина, Беларусь елдерінің музыка мамандары қазақ баласының өнерін жоғары бағалады. Асланға екінші орынмен қатар арнайы диплом табысталды. Бұған қоса, астаналық дарын Италияның бір композиторымен ән жазу құқығына ие болып, Беларусь пен Португалияға шақырту алды.
Алғашқы кезеңде Аслан «Дудар-ай» әнімен, келесі кезеңде «How am i supposed» туындысымен баршаны тәнті етті. Осы екі кезеңнің қорытындысында жүлделі орынға ие болды.
Жас дарынға ән салу әліппесін Оқушылар сарайының ұстазы Бронислав Бугинас үйретті. Қазір Аслан Мәскеу консерваториясының түлегі, білікті ұстаз Айжан Жеңісқызынан сабақ алып жүр. Алар асулары көп болсын!
