«Іскер» бизнес орталығында «Жария» Халықаралық орталығы» қоғамдық қорының ұйымдастыруымен Дүниежүзілік туберкулезге қарсы күрес күні және оған орайластырылған туберкулездің алдын алу айлығына арналған дөңгелек үстел мәжілісі өтті.
24 ақпаннан бастап 23 наурызға дейін еліміздің барлық өңірінде өтіп жатқан айлық барысында елорда кәсіпорындарында, құрылыс ұйымдары мен базарларында халықты көшпелі тексеру жүргізілуде. Сондай-ақ, туберкулезді алдын алу мен ерте диагностика жасау бойынша елордалық медициналық мекемелердің қызметкерлеріне арнайы семинарлар мен тренингтер, фтизиатрлар мен басқа да мамандардың қатысуымен ашық есіктер, денсаулық сабақтары, дәрігерлермен кездесулер ұйымдастырылып жатыр.
Халықты туберкулездің алғашқы белгілері туралы хабардар ету, Астана қаласында құрт ауруын алдын алу айлығының шеңберіндегі іс-шаралардың барысын тиянақтау, ауруды уақытылы емдеу тиімділігін түсіндіру, қала тұрғындарын, мекемелер мен ұйымдардың қызметкерлерін ауруға қарсы іс-шараларға тарту, сондай-ақ, мигранттар мен олардың отбасы мүшелерінің туберкулезді диагностикалауға және оны емдеуге қолжетімділігін арттыру мақсатында ұйымдастырылған дөңгелек үстел мәжілісіне түрлі сала өкілдері қатысып, келелі сөз өрбітті.
Аманғали ҚАЛЖАНОВ
