«Covid-19» би-перформансы
Жасыратыны жоқ, екі жыл бойы діңкемізді құртқан жаман індет өнер саласына ауыр соққы болып тиді. Енді, міне, бойымызға ұжымдық иммунитет қалыптастырып, театрға, сахнаға деген қызығушылығымыз, ынтызарлығымыз қайта ояна бастады.
Осыны жақсы түсінген «Astana musical» театры ұжымы көрерменге «Сovid-19» пластикалық қойылымын ұсынды. Бұл туралы театрдың әртісі Бекзат Бақытжанов былай дейді: «Аты жаман індет халқымызға оңайға соққан жоқ. Осы ел басына төнген нәубатты жеңу үшін қаншама күш жұмсалды. Қазір нәтиже бар сияқты адамдар қалыпты өмірге қайта орала бастағандай. Міне, біздің мақсатымыз – сол әр адамның төтеннен келген кеселді жеңу үшін арпалысқан ішкі сезімдерін сахнада көрсету болды. Меніңше, бұл ой жүзеге толық асты деп ойлаймын».
Ал театртанушы Айзат Қыдыралиева қойылымды қимыл-қозғалыс, іс-әрекетпен жеріне жеткізе айта білген театр әртістеріне дән риза екендігін жасырмады. Сонымен «Covid-19» би-перформансы сәтті сахналанған бір ерекше спектакль болды.