Кеше ҚР Ұлттық академиялық кітапханасында Түркі академиясы халықаралық ұйымы шығарған кітаптардың және www.twesco.org ғылыми-танымдық порталының таныстырылымы өтті. Шараға кітап авторлары, белгілі ғалымдар, мәдениет және қоғам қайраткерлері қатысты.
Салтанатты жиынды ҚР Мәдениет және спорт министрлігінің жауапты хатшысы Қуатжан Уәлиев ашып, академияның тұтас түркі әлемінің рухани мұраларын насихаттаудағы ұшан-теңіз еңбегін атап өтті. Одан кейін сөз алған көрнекті мемлекет қайраткері, профессор Мырзатай Жолдасбеков аталған ұйымның шын мәнінде түркітану ғылымының тірегіне айналғанын айтып, сөзін нақты мысалдармен әдіптеді.
Түркі академиясының президенті Дархан Қыдырәлінің айтуынша, академия құрылған күннен бері, нақтылап айтсақ бес жыл ішінде әртүрлі бағыттағы 93 кітап шығарған. Соның ішінде былтыр 42 кітап оқырманға жол тартты. Атап айтсақ, тарих ғылымының докторы Ахмет Тоқтабайдың «Түркі халықтарының жылқы мәдениеті» еңбегі, «Әлихан Бөкейхан және түркі дүниесі» кітабы (Құрастырған Сұлтанхан Аққұлыұлы), көрнекті ғалым Мекемтас Мырзахметұлының «Мұхтар Әуезов – абайтанушы ғұлама», «Абайды оқы, таңырқа», «Хакім Абайды танып білудің 125 жылдық тарихынан (1889-2014)» атты үш еңбегі, т.б. кітаптар бар. Жалпы, өткен жылдың басты оқиғасы – Қазақ хандығының 550 жылдығына арналып екі еңбек жарияланды. Тарих, археология және этнография салалары бойынша – 15, әдебиет, фольклор, және өнер тақырыптарын қамтыған – 13, лингвистика саласының өзекті мәселелерін қозғаған – 6 және «Тұғырлы тұлғалар» сериясымен тағы осыншама кітап шықты.
Түркі академиясы халықаралық ұйымы шығарған кітаптардың бәрі де ҚР Ұлттық академиялық кітапханасына тарту етілді.
Аманғали ҚАЛЖАНОВ
Материалды “Астана ақшамы” газетінің astana-akshamy.kz ресми сайтына сілтеме жасағанда ғана пайдалануға рұқсат етіледі.
