Astanada ötken «Bırge taza Qazaqstan» küzgı ekologiialyq ailyǧy jäne jalpyqalalyq senbılık aiasynda Prezident saiabaǧynda aq qaiyŋdar toǧaiy paida boldy. Jalpyqalalyq senbılıkke 27 myŋnan asa adam qatysty.
Senbılık kezınde Prezident saiabaǧy aumaǧynda 400-ge juyq aǧaş otyrǧyzyldy. Onyŋ ışınde 250 dana aq qaiyŋ, 150 dana sıbır şyrşasy boi köterdı.
Sondai-aq qalanyŋ barlyq audandarynda jalpy audany 2,8 mln şarşy metrden astam aumaqty qamtyǧan saiabaqtar men gülzarlar tazartylyp, myŋǧa juyq aǧaş otyrǧyzyldy. Elordalyq poligonǧa 460 tonnaǧa juyq qoqys-qaldyq jinalyp, şyǧaryldy.
Aǧaş otyrǧyzu ıs-şarasyna qala mäslihatynyŋ deputattary, äkımdık, Amanat partiiasynyŋ ökılderı, qalalyq Qoǧamdyq keŋestıŋ, ruhani-dıni bırlestıkterdıŋ müşelerı, Uspen soborynyŋ, Ardagerler keŋesınıŋ, Beibıtşılık jäne kelısım saraiy, Täuelsızdık saraiy, «Jas sarbaz» äskeri-patriottyq klubynyŋ qyzmetkerlerı, sportşylar, ärtıster men erıktıler qatysty.
«Bügın bız senbılıkke, aǧaş otyrǧyzuǧa qatystyq, Beibıtşılık jäne kelısım saraiynyŋ janyndaǧy saiabaqqa 400 aǧaş otyrǧyzdyq, osy şarany qalalyq äkımdık pen audandyq äkımdıkter ūiymdastyrdy. Ekınşı jyl qatarynan qalamyzdy kögaldandyruǧa qatysyp kelemız» dedı körkem gimnastikadan halyqaralyq därejedegı sport şeberı, qalalyq federasiianyŋ vise-prezidentı jäne gimnastika mektebınıŋ direktory Anna Aliabeva.
Senbılık qysqy kezeŋge daiyndyqqa jäne abattandyru, kögaldandyru jäne sanitarlyq tazalau jūmystaryn jürgızuge baǧyttalǧan. Qoǧamnyŋ nazaryn ekologiialyq mädeniettı qalyptastyru men tabiǧatty saqtaudyŋ maŋyzdylyǧyna audaru basty maqsat bolyp tabylady.
Sondai-aq elorda tūrǧyndary men ūiymdary ailyq kezınde tūrǧyn üi aimaqtary men aula aumaqtaryn sanitarlyq tazalau jūmystaryn jürgızuge şaqyrdy.
Jalpy, «Bırge taza Qazaqstan» ekologiialyq ailyǧy aiasynda Astana qalasynda 4 kommunaldyq senbılık ötedı, är senbı saiyn 15 qazanǧa deiın 10 myŋnan astam jasyl jelek otyrǧyzu josparlanǧan.
