Qoǧamda keiıngı kezde polisei qyzdarǧa degen qūrmet arta tüstı. Onyŋ sebebı de bar. Bırınşıden, airyqşa tözım men küş-jıgerdı qajet etetın, er-azamattarǧa tän būl mamandyqty taŋdau ekınıŋ bırınıŋ qolynan kele bermeidı. Ekınşıden, būǧan tek özıne-özı sengen ärı osy salaǧa bükıl ömırın arnaǧan jandar ǧana keletındıkten bolsa kerek. Astana qalasy Polisiia departamentı jergılıktı polisiia qyzmetı basqarmasynyŋ inspektory, polisiia maiory Naira Elemesova – osyndai jan.
Onyŋ äkesı Elemes Nūrahmetov te ömır boiy ışkı ıster salasynda qyzmet ıstep, zeinet demalysyna şyqqan ardager polisei. «Ūiada ne körseŋ, ūşqanda sony ılesıŋ» degendei, şaŋyraqta jinaqylyq pen tärtıpke, şeksız meiırımge qanyǧyp ösken onyŋ armanyna qanat sermep, mamandyq taŋdauǧa kelgende oilanbastan äke jolyn jalǧastyrǧysy kelgenı sondyqtan.
Şyǧys Qazaqstan oblysy Ūlan audanynyŋ Bozanbai auylynda düniege kelgen Naira Elemesqyzy Qasym Qaisenov atyndaǧy orta mekteptı oidaǧydai aiaqtaǧannan keiın, Semei qalasyndaǧy zaŋ kolledjıne oquǧa tüstı. Otbasyndaǧy közınıŋ qaraşyǧyndai jalǧyz qyzy osyndai adamdarmen etene aralasyp jūmys ısteudı talap etetın jauapty da qūrmettı mamandyqty taŋdap tūrsa, ata-anasy oǧan qalai qarsy tūrsyn?! Ekeuı de qyzyna aq batasyn beredı.
Işkı ıster ministrlıgınıŋ zaŋ kolledjın tämamdaǧannan keiın Naira bılımın Şyǧys Qazaqstan aimaqtyq universitetınde jalǧastyryp, joǧary bılımdı «zaŋger» mamandyǧyn alyp şyqty.
Boiyna bılım närın sıŋırıp, ömırge alǧaş qadam basqan qarşadai qyz eŋbek jolyn 2009 jyldyŋ şılde aiynda Ūlan audany Işkı ıster basqarmasynda kämeletke tolmaǧandar ısı jönındegı aimaqtyq uchaskelık inspektory bolyp bastady. Sodan berı qūqyq qorǧau organynyŋ ystyǧy men suyǧyna tözıp, antyna adal bolyp eŋbek etıp keledı. Ol özınıŋ aşyq ta jaidary, köpşılıkpen tez tıl tabysatyn mınezımen ärıptesterınıŋ qūrmetıne bölenıp jür.
– Astana qalasyndaǧy qyzmetıme 2022 jyly keldım. Bızdıŋ ūjymda yntymaǧy jarasqan tatu qyzmetkerler jūmys ısteidı. Jūmysym özıme ūnaidy. Özıŋe jüktelgen mındetterdı neǧūrlym tiianaqty atqarsaŋ, adamdardyŋ da saǧan degen senımı soǧūrlym arta tüsetınıne közım jettı. Qazır atqaryp jürgen şaruamyz qarapaiym adamdarmen tıkelei bailanysty bolǧandyqtan, olardyŋ senımın aqtau – basty paryzym, – deidı Naira Elemesqyzy.
Ol bos uaqytyn köbıne jelkıldep ösıp kele jatqan büldırşın qyzynyŋ tärbiesıne arnaǧandy qalaidy eken.
«Qyzym Mūnar qaladaǧy №32 mekteptıŋ 5-synybynda oqidy. Oqu ülgerımı jaqsy. Qyzymnyŋ bolaşaǧynan ülken ümıt kütemın. Ekeumız köbıne tabiǧat aiasyna şyǧyp seruendegendı, kıtap oqyǧandy, dämdı taǧamdar daiyndaǧandy ūnatamyz. Eŋ süiıktı taǧamymyz – manty men et qosylǧan bälış» dep aǧynan jaryldy polisiia maiory.
Kündelıktı qyzmetınde taŋ atqannan tün jarymǧa deiın bolatyn näzık jandy Naira polisiia qyzmetın taŋdaǧanyna eş ökınbeidı. Äuletınde äkesınen jalǧasqan mamandyqtyŋ jauapkerşılıgın jaqsy sezınıp, ony adal atqaruǧa bel buǧan.
Mıne, taǧy da nūryn şaşyp taŋ atty. Alda jaŋa kün, jaŋa tapsyrma. Uaqytpen sanaspai, elge qyzmet etuge asyǧyp bara jatqan pogon taqqan aru biık belesınıŋ alda ekenın jaqsy sezedı.
