Astana qalasy Polisiia departamentınıŋ bastyǧy, general-maior Marat Tölebaev halyqqa esep beru kezdesuın ötkızdı. Jiynǧa Astana qalasy mäslihatynyŋ deputattary men qalalyq Qoǧamdyq keŋesınıŋ müşelerı, qala audandarynyŋ basşylary, dın ökılderı qatysty.
Vedomstvo basşysy elorda departamentınıŋ ötken jyldaǧy jūmysynyŋ qorytyndylaryna toqtalyp, qūqyqtyq tärtıptı qamtamasyz etuge qatysty tuyndaǧan mäseleler men ūsynystardy tyŋdady. Ötken jyldyŋ qorytyndysy boiynşa qylmystar sanynyŋ azdap öskenı baiqalyp otyrǧanyn, bıraq qabyldanǧan şaralardyŋ arqasynda ūrlau, tonau, kölıktı aidap äketu, būzaqylyq faktılerınıŋ azaiǧanyn, köşelerde, otbasylyq-tūrmystyq salada qylmystar sany tömendegenın, kısı öltıru, zorlau, tonau, kölıktı aidap äketu, vandalizm, qalta ūrlyǧy syndy qylmystardyŋ bärı aşylǧanyn atap öttı.
Onyŋ aituynşa, köşelerde qauıpsızdıktı qamtamasyz etu şaralaryn küşeitudıŋ arqasynda qylmystar azaiǧan. Oǧan beinebaqylau jüielerın jetıldıru şaralary da oŋ yqpal etken. Beinebaqylau kameralarynyŋ kömegımen 3 myŋnan astam qylmys aşylyp, 28 myŋǧa juyq būzuşylyq anyqtalǧan.
Departament bastyǧy basty baǧyttardyŋ bırı esırtkı biznesımen barynşa küres ekenın atap öttı. Soŋǧy ekı jylda elordada jasyryn türde sintetikalyq esırtkını daiyndaumen ainalysatyn 7 esırtkı zerthanasynyŋ qyzmetı toqtatyldy, 200-ge juyq jarnama jasau alaŋdary joiyldy. Zaŋsyz ainalymnan 350 kelı bolatyn türlı esırtkı zattary, sonyŋ ışınde 50-den astam sintetikalyq esırtkı tärkılendı.
Marat Tölebaev internet- alaiaqtyq mäselesı öte özektı problema bolyp otyrǧanyn, aldanyp qaludyŋ negızgı sebepterınıŋ bırı tūrǧyndardyŋ sifrlyq sauattylyǧynyŋ tömendıgı ekenın atap öttı. Onyŋ sözınşe, qabyldanǧan şaralardyŋ arqasynda ötken jyly 233 adam jäne 4 top ūstalyp, qūqyqqa qaişy äreket jasaǧan 210 internet-resurs būǧattauǧa joldanǧan, al onyŋ 85-ı būǧattalǧan.
Marat Tölebaev oqu mekemelerındegı balalar qauıpsızdıgı mäselesıne erekşe köŋıl bölınetının, memlekettık mekemelerdıŋ, balabaqşalardyŋ jäne kolledjderdıŋ beinekameralary men dabyl batyrmalary 100% jedel basqaru ortalyǧyna qosylǧanyn atap öttı. Ötken jyldyŋ şılde aiynan berı tūrmystyq zorlyq-zombylyq üşın äkımşılık jäne qylmystyq jauapkerşılıktıŋ küşeitılgenın jetkızdı.
Qazır tūrmystyq qūqyqbūzuşylyqtardy tırkeu formasy säl özgerıp, naqty tüsken aryzdardy ǧana emes, jasalǧan qylmystardy anyqtauǧa den qoiyldy. Mäselen, bügınde janjal şyǧaruşyny jäbırlenuşınıŋ aryzynsyz jauapkerşılıkke tartuǧa bolady, taraptardyŋ qaita tatulasuyn boldyrmaityn tetık te qosyldy. Astanalyq poliseiler ūsaq qūqyq būzuşylyqtardyŋ aldyn alu jäne «müldem tözbeu» atmosferasyn qalyptastyru boiynşa jūmystardy da nazardan tys qaldyrmaidy.
Astanalyq poliseiler bır jyl ışınde bır millionnan astam äkımşılık qūqyq būzuşylyqty, tynyştyqty būzudyŋ 18 myŋnan astam faktısın anyqtaǧan.
Vedomstvonyŋ basşysy jol jüru jaǧdaiyna jeke toqtalyp öttı. Osy jyldyŋ aqpan aiynan berı qala joldarynda «Erkin Patrol» mobildı apparattyq-programmalyq keşenımen jabdyqtalǧan ekipaj patrul jasaidy. Būl keşen avtokölıktıŋ jyldamdyq rejimın būzu faktılerın tırkep, 360 gradusty panoramalyq baqylau arqyly ızdeude jürgen kölık qūralyn anyqtaidy. Bügıngı künı onyŋ kömegımen jol qozǧalysy erejelerı būzylǧanynyŋ 3501 faktısı anyqtalǧan. Osy jyldyŋ basynan berı jürgızuşıler polisiiany jäne saqtandyru kompaniiasyn şaqyrmastan jol-kölık oqiǧasyn «Eurohattama» boiynşa onlain tırkei alady. Alaida qabyldanyp jatqan şaralarǧa qaramastan jol-kölık oqiǧalary 19,8%-ǧa, jaraqat alǧandar 20,9%-ǧa, qaitys bolǧandar 25%-ǧa ösken.
Departament bastyǧy sözın aiaqtai kele, azamattar qoiǧan barlyq sūraqtarǧa jauap berıp, ūsynystaryn tyŋdady. Äleumettık jelılerdegı resmi paraqşaǧa kelıp tüsken saualdarǧa da jauap berdı. Şetkı aimaq tūrǧyndary jol qauıpsızdıgı, beinebaqylau kameralary men qosymşa baǧdarşamdardy ornatu, tynyştyqty būzu, uchaskelık polisiia inspektorlarynyŋ jetıspeuşılıgı mäselesıne qatysty sūraqtar qoidy. Uchaskelık polisiia inspektorlarynyŋ jūmysyna qatysty alǧystaryn aitqan tūrǧyndar da az bolmady.
