Elorda tūrǧyndary qala tazalyǧyna belsendı atsalysuda. Osy maqsatta şaharymyzda jyl saiyn ekologiia aksiiasy ötıp, igı ıs aiasynda üzdık aulalar anyqtaluda. Biylǧy «Taza Qazaqstan: Astana – tazalyq pen tärtiptiŋ ülgisi» ekologiia ailyǧy barysynda Almaty audany boiynşa R.Qoşqarbaev daŋǧyly, 46/1 üidıŋ aulasy ajarly dep tanyldy.
Memleket basşysynyŋ tapsyrmasy negızınde elorda köşelerı tazartylyp, aumaqtarda kögaldandyru jäne abattandyru, sondai-aq joldardy retke keltıru jūmystary qyzu jürıp jatyr. Būl ıske Almaty audanyna qarasty R.Qoşqarbaev daŋǧylyndaǧy №46/1 üidıŋ tūrǧyndary belsene qatysty. 2022 jyldyŋ 7 aqpanynan berı ol üige «Tūrsyn Astana-2» menşık ielerı basqarmasy qyzmet körsetıp keledı. MİB jetekşısı Quanyş Ospanovtyŋ ıskerlıgı men tūrǧyndardy tazalyq pen tärtıpke jūmyldyra bıluınıŋ nätijesınde aulada soŋǧy jyldary köp jūmys ısteldı.
– Būl baiqauǧa bız 2 jyl daiyndaldyq. Aulamyzdyŋ būrynǧy kelbetı jūrt qyzyǧarlyqtai emes edı. Osy uaqyt aralyǧynda edäuır qiyn kezeŋdı bastan ötkerdık, jertölede köp jūmys ısteuımızge tura keldı. Bügınde bärı de artta qaldy. Aulamyz jaŋardy. Üidegı barlyq jertölede jylu qūrylǧylary auystyryldy. Bıraq bız mūnymen şektelmeimız, alda älı talai jūmys atqaru oiymyzda bar. Byltyr aulamyz ben jertölemız jaŋarsa, biyl aumaqty jaryqtandyru qolǧa alynyp jatyr. Osy künge deiın bırşama şarua tyndyrylǧanmen, alǧa qoiǧan josparlarymyz odan da köp. Būl rette tūrǧyndardyŋ auyzbırşılıgı barlyq mäselenıŋ şeşıluıne jol aşty. Osy rette üidegı 300 päterdıŋ ärqaisysyna jeke-jeke alǧys aitqym keledı. «Üzdık aula» ataǧyn jeŋıp aluymyzǧa tūrǧyndardyŋ ärqaisysy özınşe atsalysty. Bızdıŋ jeŋısımız – ortaq eŋbektıŋ jemısı, – dedı MİB jetekşısı.
İä, aitsa aitqandai, būl üidıŋ tūrǧyndary erekşe ūiymşyl eken. Ol, ärine, qyzmet körsetuşı MİB jetekşısınıŋ jūmysty ūiymdastyra bıluınıŋ arqasy. Olai deitın sebebımız, būl üide är mereke saiyn aulaǧa qazaqtyŋ kiız üiı tıgılıp, atauly kündı tūrǧyndarmen bırge köŋıldı ärı este qalarlyqtai etıp atap ötu dästürge ainalǧan jäne osy üidıŋ barlyq tūrǧyny: kärısı de, jasy da qalmai, bır kısıdei atsalysady. Ūiymşyldyqtyŋ arqasynda atqarylǧan ıs nätije berıp, aula zamanaui kelbetke ie boldy.
Köptıŋ arasynan oza şauyp, üzdık atanu, ärine, oŋai emes. Täjıribelı maman, bılıktı basşy Quanyş Vladimirovich būl rette jeŋıske jetudıŋ qūpiiasymen bölıstı.
– Astanada tazalyq ailyǧy bastalǧaly berı bızdıŋ aula tūrǧyndary är senbı künın asyǧa kütedı. Olar ainalanyŋ tazalyǧyna üles qosudy azamattyq boryşymyz deidı. Ekologiia ailyǧy biyl 11 mamyrǧa deiın jalǧasady. Bır ai boiy tūrǧyndar joǧary köŋıl küimen, öz erkımen senbılıkke şyǧyp, aumaqty sypyryp, aǧaştardy äktep, jan-jaqty retke keltırude. Maŋaiymyz tazaryp, köktemnıŋ lebı sezılıp jatyr. Jalpy qalamyzdyŋ taza boluy mädenietımızdı, adamgerşılıgımızdı körsetedı dep oilaimyn. Al üzdık aula qandai boluy kerek deseŋız, menıŋ oiymşa, üzdık aula bolu üşın, eŋ aldymen, tūrǧyndardyŋ ūiymşyldyǧy maŋyzdy. Bırlese atqarylǧan ıste bereke bolady eken. Bız jan-jaqqa tartpai, bır baǧytta, tek jaqsylyqqa jarşy bola jürıp, bastysy, tūrǧyndar üşın jaily aula jasauǧa talpyndyq. Bärımızdıŋ oiymyz bır jerden şyqqandyqtan, nätijege tez ärı oŋai qol jetkızdık. Bolaşaq ūrpaqqa taza aua, taza qala qaldyrsaq deimız, – dedı Quanyş Ospanov.
