Qalalyq mäslihat hatşysy Janat Nūrpeiısov Respublika daŋǧyly, 7/2 üidıŋ tūrǧyndarymen kezdesıp, olardyŋ tüitkılderın tyŋdady.
Atalǧan üige qarama-qarsy «Astana LRT» JŞS-ne qarasty sport alaŋy ornalasqan eken. Alaida tūrǧyn üidıŋ aulasynda balalar oinaityn alaŋ joq. Tūrǧyndardyŋ aituynşa, serıktestıktıŋ alaŋynda kümändı adamdar jiı jinalady. Sondyqtan olar balalar qauıpsızdıgıne alaŋdaidy. Halyq balalardyŋ qauıpsızdıgın qamtamasyz etıp, jetkınşekterdıŋ oiynyna laiyqtau üşın sporttyq alaŋdy uaqytşa paidalanuǧa beru mäselesın qarastyrudy sūrady.
Būl kezdesuge Saryarqa audany äkımınıŋ orynbasary Rişat Tūrdybekov, Kölık jäne jol-kölık infraqūrylymyn damytu basqarmasynyŋ, Aktivter jäne memlekettık satyp alu basqarmasynyŋ, «Astana LRT» JŞS, qalanyŋ PİK qauymdastyǧynyŋ ökılderı qatysyp, tūrǧyndardyŋ talap-tılekterın tyŋdady. Qazırgı taŋda mūndaǧy «Astana LRT» JŞS ielıgındegı aumaq pen parkingtı qalanyŋ kommunaldyq menşıgıne beru üderısı jürıp jatqanyn jetkızdı. Tiıstı jūmystan soŋ tūrǧyndardy uaqytşa paidalanuǧa beru mäselesın zaŋdyq tūrǧydan qarastyratynyna sendırdı. Qandai şeşım şyqsa da, tūrǧyndar habarsyz qalmaitynyn aityp öttı.
