«Köktal -2» qalai abattanady?
«Köktal-2» tūrǧyn alabynyŋ infraqūrylymyn damytu 2012 jyly bastaldy. Alaida arada alty jyl ötse de, atqarylar ıs älı şaş etekten. Juyrda qalalyq mäslihat hatşysy Janat Nūrpeiısovtıŋ jeke qabyldauynda bolǧan atalmyş tūrǧyn alaptyŋ bır top tūrǧyndary abattandyru tym sozylyp ketkenıne, trotuarlardyŋ salynbaǧanyna, joldardyŋ tozǧanyna, kärız qūdyqtarynyŋ aşyq jatqanyna, qoqys alaŋdarynyŋ jetkılıksızdıgıne şaǧymdandy.
Osy äŋgımeden keiın mäslihat hatşysy №68 orta mektepte tūrǧyndardyŋ Saryarqa audany äkımdıgınıŋ ökılderımen, qalanyŋ bırqatar basqarmalarynyŋ qyzmetkerlerımen, merdıger ūiymdardyŋ basşylarymen kezdesuın ūiymdastyryp, tuyndaǧan mäselenı talqylady.
«Jobanyŋ jalpy qūny – 8 mlrd teŋge. Būl respublikalyq biudjetten qarjylandyrylyp otyr. Merdıger özıne alǧan mındettı biyl tolyǧymen oryndaimyn dep uäde berdı. Osy jyly jūmystardy aiaqtau üşın qalǧan 1 mlrd teŋgenıŋ bölınu mäselesın äkımdıktıŋ aldyna qoiu kerek. Eger biudjet osyndai mümkındık berse, jūmystyŋ negızgı bölıgı aiaqtalady. Mäsele qarjylandyruda bop tūr» dedı Janat Nūrpeiısov.
Qalalyq mäslihattyŋ otyrystarynda joldardy salu mäselesı qyzu pıkırtalasqa ūlasqanyn talai estıdık. Sonda keibır mektepter men balabaqşalarǧa aparatyn joldar salynbaǧany da aityldy. Ärine, kölık ielerı de sodan zardap şegude. Kezdesuge qatysuşylar osyǧan nazar audardy. «Uaqytşa asfalt töseuge bolmai ma? Balalarymyz küz jäne köktem mezgılderınde mektepke batpaqty keşıp jetedı. Eldı mekende kedır-būdyry köp kem degende bes köşe bar. Solardy ainalyp ötemız dep, baratyn jerımızge keşıgıp jetıp jatamyz» deidı olar.
Merdıger ūiym ökılınıŋ aituynşa, qazırgı taŋda tiıstı jūmystar 70 paiyzǧa oryndalǧan. Kestege säikes joldar qūrylysy biyl aiaqtalmaq. Jaz bıtkenşe qalǧan köşelerge asfalt töseledı. «Tūrǧyn alaptyŋ şyǧysynda ornalasqan köşelerdı asfalttaudy aiaqtau ǧana qaldy. Ūlytau köşesı asfalttaldy. Osy aida Bostandyq köşesıne asfalt töseu josparǧa engızıldı. Säikes jūmystar Amantoǧai jäne Köktal köşelerınde de jüredı» dep tüsındırdı ol.
Bıraq mäsele joldar qūrylysynda ǧana emes eken. Tiıstı jobaǧa säikes Mūnda nöser jäne şaruaşylyq-tūrmystyq kärız, elektr jäne su jelılerı de salynuy kerek.
«İnfraqūrylym qūrylysynyŋ jobasy bar. Būl joba saraptamadan öttı. Säikes jūmystarǧa jyl saiyn bölınıp otyrǧan qarjy 100 paiyz igerılude. Joba boiynşa osy jylǧa 965 mln teŋge bölındı. Esepteu jasalǧan soŋ, keste boiynşa jūmystardy aiaqtauǧa būl qarjy jetpeitındıgı anyqtaldy. Qosymşa qarjy alu üşın äkımdıkke habarlastyq. Biudjettık tapsyrysqa säikes jūmystardy bıtıruge taǧy 1 mlrd teŋge sūrauǧa bolady. Al äzırge qolda bar qarjyǧa abattandyru men keibır köşelerge asfalttyŋ joǧarǧy qabatyn salu josparlanyp otyr» dedı Kölık jäne jol-kölık infraqūrylymyn damytu basqarmasy basşysynyŋ orynbasary Darhan Boranbaev.
Tūrǧyn alapqa kärız qaşan tartylady degenge kelsek, būl mäselenı «Astana su arnasy» MQK direktorynyŋ orynbasary Sergei Vilkov tüsındırdı. Onyŋ sözınşe, jetkızuşı kollektordyŋ qūrylysy aiaqtalyp qaldy. Būl ıs küzge deiın bıtıp, kollektor tolyq quatynda jūmys ıstei bastaidy. Kölık jäne jol-kölık infraqūrylymyn damytu basqarmasy salyp jatqan barlyq köşeler kärızdıŋ ortalyq jüiesıne qosylady.
«Nöser kärızı jūmys ısteu üşın bırınşı kezekte elektrquaty kerek. Sosyn kärızdık sorǧy stansasyn qosyp, qazır salynyp jatqan basty jelıge jalǧau qajet» dep tüsındırdı merdıger.
Kentte jūmys ıstemei tūrǧan qūdyqtar bar eken. Tūrǧyndar olardy jabudy sūrady. Jauapty mekeme ökılınıŋ sözınşe, qaqpaqtar jiı ūrlanǧandyqtan, qūdyqtar aşyq qalyp jatady. «Būl mäselenı juyq arada şeşuge tyrysamyz» dedı ol.
Saryarqa audany äkımdıgınıŋ ökılı tūrǧyn alapta jaqynda qoqys alaŋdarynyŋ qūrylysy aiaqtalatynyn jetkızdı. Onyŋ aituynşa, «Köktal-2»-ge 80-nen astam konteiner bölındı. Alaida alap tūrǧyndarynda qoqysty şyǧaru boiynşa 3 mln teŋge şamasynda qaryz jinalyp qalypty.
«Konteinerlerdı ornatqanda qoqys tasityn kölıkke arnalǧan «qaltany» da salu kerek. Äitpese, qoqysty artuǧa kelgende būl kölıkter jeke kölıkterdıŋ jüruıne ünemı kedergı keltırıp jatady. Sosyn konteinerlerdı ornatqanda bızben de aqyldassaŋyzdar degen tılegımız bar» dedı köktaldyqtar.
Tūrǧyndar Saryarqa audany äkımdıgınen kentke kıreberıste köşelerdıŋ atauy jazylǧan belgı ornatudy da sūrady. Būl kezdesude qalalyq mäslihat hatşysy Janat Nūrpeiısov, mäslihat deputaty Zūlpyhar Ǧaiypov barlyq ūsynys-tılekter eskerıletının jetkızdı.
Mäslihat hatşysy ıle-şala «Nūr Otan» partiiasy qalalyq filialynyŋ qoǧamdyq qabyldauynda halyqty jeke mäselelermen qabyldady. Onymen kezdesuge kelgen tört adam azamattardyŋ jeke sanattaryna äleumettık kömek körsetu, tūrǧyn üi-kommunaldyq şaruaşylyq, jūmyspen qamtu mäselelerın şeşudı sūrady. Janat Nūrpeiısov olardy mūqiiat tyŋdap, barlyq mäselenı zaŋdyq tūrǧydan tüsındırdı. Būǧan qosa, tiıstı memlekettık organdarǧa hattardy jöneltıp, tūrǧyndar tüitkılderı baqylauynda bolatynyn aitty.