Jaqynda qalalyq «Mereilı otbasy» baiqauynyŋ soŋǧy syny ötedı. Oǧan elordadaǧy köp otbasylar qatysyp jatyr. Solardyŋ bırı – Tölegenovter äuletı.
Būl şaŋyraqtyŋ iesı – Älıbai Tölegenov. «Qazaqstan temırjoly» ūlttyq kompaniiasynda jiyrma jyldan berı jūmys ısteidı. Mamandyǧy – mehanik. Tehnikanyŋ qūlaǧynda oinaidy. Sodan ba, ärıptesterı ony qatty qūrmetteidı. Älıbai aǧamyz köp sözge joq. Oǧan qaraǧanda Külzira jeŋgemız aşyqtau eken. Baryn jaiyp saldy. Üidegı otanasynyŋ mamandyǧy – joǧary bılımdı pedagog-tärbieşı. «Nūrly jürek» äleumettık qyzmet körsetu ortalyǧynda eŋbek etedı. Būl ortalyqta mümkındıgı şekteulı balalar em alady. Külzira apaidyŋ özı balajan. Bala dese emırenıp tūrady. Sol mekemede 20 jyldan berı abyroily qyzmet ıstep keledı. «Äleumettık salanyŋ üzdıgı» degen belgımen marapattalǧan. «Mümkındıgı şekteulı jetkınşektermen jūmys ısteu oŋai emes. Ertemen qyzmetke kelıp, bırden balalardyŋ qasynan tabylamyn. Olardy juyndyryp, tamaqtandyramyz. Sabaq üiretemız. Alǧaşynda qinalǧam. Qazır üirenıp kettım» deidı apai jymiyp.
Tölegenovter otbasy bas şaharǧa 1997 jyly qonys audarǧan. Negızı, ekeuı de Aqmola oblysy Aqköl audanyndaǧy Örnek degen auyldan bolady. Bala künderınen bır-bırın jaqsy bıledı. 1981 jyly ekı jas otbasyn qūrady. 1982 jyly tūŋǧyş säbiı Bibıgül dünie esıgın aşady. Qazır ol da üş balanyŋ anasy. «AL-STAR» JŞS-te kassir bolyp jūmys ıstegen. Bügınde üide uaqytşa bala kütımımen otyr. Ekınşı balasy – Beibıt 1984 jyly tuǧan. S.Seifullin atyndaǧy Qazaq memlekettık agrotehnikalyq universitetın bıtırgen. Joǧary bılımdı maman. Onyŋ da ekı balasy bar. Kenjesı Beiımbet 1990 jyly ömırge kelgen. Qazır ol qalalyq ört söndıru salasynda ısteidı.
«Aqmola Astana bolǧanda qatty quandyq. Sodan osynda köşıp keldık. Bırden joldasym ekeumız jūmysqa ornalastyq. Balalar erjettı. Olar joǧary oqu ornynda oqydy. Qazır üşeuı de ömırden öz joldaryn tapty. Nemerelerım ösıp keledı. Äsırese, ülken nemeremnen ümıt kütemın. Esımı – Dias Şalabaev. Qazaq ūlttyq öner universitetınde oqidy. Violonchel aspabynda oinaidy. Talai halyqaralyq konkurstarda top jarǧan. Jaqynda Türkiiada ötken baiqaudan jüldeger bolyp oraldy. Joldasym ekeumız köpbalaly otbasynda östık. Özım ösken üide on bala boldy. Äkem – soǧys ardagerı. Qazır aramyzda joq. Anam bar. Seŋgırlı seksennen asqan. Bızdıŋ bar qyzyǧymyzdy körıp, ortamyzda otyr» dedı Külzira İslamqyzy.
Mıne, elımızdegı şattyqqa toly şaŋyraqtyŋ bırı… Al mūndai berekelı otbasylar jüzdep emes, myŋdap sanalatyny anyq.
Azamat QŪSAIYN
