Qazaqstan Respublikasy täuelsızdıgınıŋ 25 jyldyǧy jäne L.Gumilev atyndaǧy Euraziia ūlttyq universitetınıŋ 20 jyldyǧy aiasynda atalǧan joǧary oqu ornynda körnektı memleket jäne qoǧam qairatkerı, qazaq televiziiasynyŋ negızın qalauşylardyŋ bırı, teledramaturg, publisist-jazuşy Sūltan Orazalynyŋ 75 jasqa toluyna arnalǧan «Qazaq ruhaniiatynyŋ sardary» atty şyǧarmaşylyq keşı öttı. Jaqsy men jaisaŋ jinalǧan keşte aitylǧan lebızder legı QR Memlekettık hatşysy Gülşara Äbdıqalyqovanyŋ mereitoi iesın qūttyqtau hatymen bastaldy.
Sūltan Orazaly 1964-1984 jyldary Qazaq televiziiasynda redaktor, aǧa redaktor, bas redaktor qyzmetın atqardy. Osy jyldary onyŋ qalamynan jüzdegen ädebi telessenariiler men telepesalar tuyp, kögıldır ekranǧa şyǧaryldy. Äsırese, «Sūhbat», «Qymyzhana», «Kezdesu», «Şūǧyla», «Aitys», «Halyq qazynasy» syndy ūlttyq baǧdarlamalardyŋ avtory ärı jürgızuşısı bola jürıp, Ǧabit Müsırepov, Ǧabiden Mūstafin, Iliias Esenberlin, Tahaui Ahtanov syndy qazaq ädebietı alyptarynyŋ asyl beinelerın taspaǧa qaldyrdy. «Adamzattyŋ Aitmatovy» atanǧan qyrǧyz jazuşysy Şyŋǧys Aitmatovpen de sūhbattasty. Osy sūhbattardyŋ bärı qazır Qazaq televiziiasynyŋ altyn qorynda hattauly tūr.
Sūltan Orazalynyŋ televiziia salasyndaǧy eŋbegı ūltqa qyzmet etetın ülken mūraǧa ainalyp, şejırelık sipat alyp kettı. Qalamdas ınısınıŋ mereitoiyna orai alystan at arytyp jetken akademik Serık Qirabaev qoǧam qairatkerınıŋ şyǧarmaşylyq jäne azamattyq kelbetıne toqtalyp, iyǧyna qazaqy saltpen şapan japty.
Mereitoi iesı köp jyl memlekettık qyzmet atqaryp, täuelsızdıgımızdıŋ nyǧaiuyna sübelı üles qosty. Mäselen, Tıl komitetınıŋ tūŋǧyş töraǧasy boldy. 1998 jyldyŋ qaŋtarynda Avtorlyq qūqyq jönındegı agenttıgınıŋ töraǧasy qyzmetıne taǧaiyndalyp, Astanaǧa kelgen ziialy qauymnyŋ basy bolyp, bas qalamyzdyŋ qalyptasu kezeŋın közımen kördı. Astana turaly tolǧanysy keş barysynda körsetılgen şaǧyn beinefilmde qamtyldy. Taiauda respublikalyq «Önegelı ömır» seriiasymen «Sūltan Orazaly» kıtaby jaryq kördı. Jiyn barysynda sonyŋ tanystyrylymy ötıp, jinalǧandar kıtap keiıpkerı turaly saliqaly pıkır örbıttı.
Amanǧali QALJANOV
