Apta soŋynda Astanada qazaq küresınen Aziia chempionaty şymyldyq türedı. Bairaqty bäsekede elımız ben Japoniia, Şri-Lanka, Özbekstan, Täjıkstan, Türıkmenstan, Moŋǧoliia, İran, Päkıstan, Qyrǧyzstan, Ündıstan memleketterınıŋ 80 baluany baq synamaq.
Bozkılem törınde Aziianyŋ kıl myqtylary 8 salmaq därejesı boiynşa beldesıp, tüiepaluandyq jüldenı de sarapqa salmaq. Mädeniet jäne sport ministrlıgı men Astana qalasynyŋ äkımdıgınıŋ, «Samūryq-Qazyna» ūlttyq äl-auqat qorynyŋ jäne ERG Euraziialyq tobynyŋ qoldauymen, Halyqaralyq qazaq küresı federasiiasynyŋ ūiymdastyruymen ötetın chempionatta 16 sport töreşısı jūmys ısteidı.
Qazaq küresı qazaq halqynyŋ ūlttyq sport türı ǧana emes, sondai-aq IýNESKO-nyŋ materialdy emes mūralar tızımıne de kırgen bolatyn. Aita ketu kerek, ötken jyly qūrylǧan Halyqaralyq qazaq küresı federasiiasynyŋ prezidentı bolyp Energetika ministrı Qanat Bozymbaev taǧaiyndalǧan-dy. Al federasiianyŋ vise-prezidentterı qatarynda qazaqtan şyqqan tūŋǧyş Olimpiada chempiony Jaqsylyq Üşkempırov pen daŋqty baluan Däulet Tūrlyhanov jäne QHR men Polşa Federasiialarynyŋ jetekşılerı bar.
Jalpy, jyl saiyn osy ūlttyq sport türınen bırneşe halyqaralyq jäne respublikalyq jarystar dästürlı türde ötıp tūrady. Atap aitar bolsaq, soŋǧy 5-6 jyldan berı ötkızılıp kele jatqan «Qazaqstan barysy», «Euraziia barysy», «Älem barysy» turnirlerı Alty Alaştan bölek, alty qūrlyqtyŋ nazarynan tys qalmaidy desek, artyq aitqandyq bolmas. Sondai-aq, qazaq küresınen ötken byltyrǧy Älem chempionatyna 40 elden 160 baluan qatysqan bolatyn.
Halyqaralyq qazaq küresı federasiiasynyŋ bas hatşysy Azamat Tıleulesovtıŋ aituynşa, aldaǧy Aziia chempionatynyŋ jülde qory 20 myŋ AQŞ dollaryn qūraidy.
