Nūr-Sūltan qalasy äkımdıgınıŋ Halyqty jūmyspen qamtu ortalyǧynyŋ mälımetı boiynşa ötken jyly jūmyspen qamtu ortalyǧyna 10688 adam jügınıp, 3997 azamat jūmysqa ornalasuǧa mümkındık alǧan. Biyl ortalyqqa jūmys sūrap barǧan 15 myŋnan asa adamnyŋ bügınge deiın 9579-y tūraqty jūmysqa ornalasqan. Sonyŋ ışınde «Jūmyspen qamtudyŋ jol kartasy» baǧdarlamasy arqyly 4000-ǧa juyq elordalyq jūmysşy mamandyqtary boiynşa eŋbekke aralasqan.
Desek te jūmys beruşılerdıŋ ötınımderı boiynşa Nūr-Sūltan qalasyna älı de 17 jūmysşy mamandyǧy qajet. Atap aitqanda, aspaz, naubaişy, konditer, tıgınşı, tıgınşı-şeber, şaştaraz şeberı, baqylauşy-kassir, animasiia jäne videografika, tärbieşı kömekşısı, jihaz qūrastyruşy, aǧaş boiau sehynyŋ şeberı, armaturşy, montajdauşy, gaz jabdyqtaryn paidalanu jäne jöndeu jönındegı slesar, gaz-elektr dänekerleuşı, elektr slesary, jartylai avtomatty maşinada elektr dänekerleuşı.
Osy mamandyqqa oqityndar jūmys beruşımen äŋgımelesıp, oŋ şeşım alǧan soŋ merzımı üş ailyq kurstan ötedı. Memleket oqu kezınde 21787 mölşerındegı şäkırtaqy töleidı. Būl biyl karantin jaǧdaiynda ūiymdastyrylǧan qysqamerzımdı tegın kurstar bolatyn.
Jalpy, «Jūmyspen qamtudyŋ jol kartasy» baǧdarlamasy jūmyssyzdar üşın ülken qoldau bolyp tūr. Äsırese qūrylys, jöndeu, kögaldandyru salalarynda bos jūmys oryndary bar ekenın de alǧa tartty. Qoǧamdyq jūmystar, äleumettık jūmys oryndary da ekı qolǧa bır kürek tappai jürgender üşın tabystyŋ közı.
Nūr-Sūltan qalalyq Käsıpkerler palatasynyŋ direktory Almat Jünısov «Jūmyspen qamtudyŋ jol kartasy» aiasynda 148 myŋnan astam jūmys orny aşylǧandyǧyn aitty. Sondai-aq eŋbek naryǧynda ülken sūranysqa ie mamandyqtardy oqytu «Atameken» ŪKP janyndaǧy oqu ortalyqtarynda jürgızıledı. Qazırgı uaqytta būl tızımge qaladaǧy 80 oqytu orny kıredı. Onyŋ 54-ı – käsıporyndar, 7-euı – kolledjder, 3-euı qauymdastyqtar janynda ornalassa, 16-sy derbes jūmys ısteidı. Elorda äkımdıgı janyndaǧy Jūmyspen qamtu mäselelerı jönındegı vedomstvoaralyq komissiia otyrysynda aǧaş syrlau sehynyŋ şeberı, gaz-elektr dänekerleuşı, elektr ūstasy, gaz qūral-jabdyqtaryn qūrastyru jäne jöndeu ūstasy, jartylai avtomattandyrylǧan maşinadaǧy elektr dänekerleuşı, armaturaşy jäne montajdauşy siiaqty jūmysşy mamandyqtaryna 200 adamdy oqytu közdelgen.
Joǧarydaǧy mälımetterge qarap otyryp qalada jūmysşy joq pa, älde jūmysşy boluǧa yqylas joq pa degen oi keledı. Öitkenı elordada bügınde 17 jūmysşy mamandyǧyna sūranys bar eken. Bıraq sol sūranysqa ie jūmysşy tabu oŋai bolmai tūr. Sondyqtan käsıporyndarǧa kerektı mamandy oqytuǧa Ükımet äuelden aitarlyqtai köŋıl bölıp keledı. Al halyqtyŋ bır kezdegı jūmysşy mamandyǧyna degen tömen yqylasyn pandemiia da tezge salǧandai. Öitkenı däl qazırgı kezde jūmysşy mamandyǧynyŋ qajettıgın uaqyt körsetıp otyr. Elde jariialanǧan karantin kezınde qos-qos diplomy barlardan görı aspazdar men konditerlerdıŋ däurenı jürıp tūrǧandai.
Būǧan deiın de memleket jastardyŋ tehnikalyq bılım aluyna erekşe köŋıl böldı. Käsıptık-tehnikalyq bılım beru jüiesı özgergenı bolmasa, keŋestık mektepten tanys. Alaida ūqsas bolǧanmen, qazırgı talap tıpten basqa. Öitkenı qazır qoǧamnyŋ jūmysşy mamandyqtaryna zärulıgı qatty bılınedı. Osydan otyz jyldai būryn eŋbek naryǧynda käsıbi, bılıktı jūmysşy mamandyǧynyŋ jetpeitını aitylatyn. Būl mäsele qazır de özektılıgın joiǧan joq. Bır ǧana mysal, adamnyŋ baspanaǧa sūranysyn qamtu qūrylystyŋ şapşaŋ jüruımen bailanysty. Bıraq boi köterıp jatqan qūrylys sapasynyŋ jiı synǧa ūşyrauynyŋ bır ūşy bılıktı jūmysşy mamandardyŋ jetıspeuınde jatqan siiaqty.
– Negızgı mamandyǧym – ekonomist. Bıraq bır jyl da osy diplommen jūmys ıstei almadym. Täjıribe joq. El qatarly diplom alu kerek bolǧan soŋ oqyp edım. Osy kezge deiın qūrylys salasynda jai ǧana jūmysşy boldym. Keiın qaladaǧy Jūmyspen qamtu ortalyǧyna kelıp, mūnda jūmysşy mamandyǧyna tegın oquǧa bolatynyn jäne sūranystyŋ bar ekenın bıldım. Qazır men elektr dänekerleuşı mamandyǧyna oqyp jatyrmyn. Būiyrsa, jūmys ta tabylady dep senemın, – deidı Nūr-Sūltan qalasynyŋ tūrǧyny, Aslan Habiev.
Bügıngıdei elımız öndırıstık-innovasiialyq damu jolyna tüskende jūmysşy mamandarynyŋ būrynǧydan beter qajettıgı sezıledı. Būl turaly aitylǧanyna da bırneşe jyl boldy. Joǧarydaǧy Jūmyspen qamtu ortalyǧynyŋ mälımetıne süiene otyryp, qazır jastardyŋ köbı käsıptık mamandyqtarǧa qyzyǧa qoimaidy degen tüsınık eskırgendei. Qaita qoǧam qajet etıp otyrǧan zäru mamandyqtardy igeruge jastarymyzda qūlşynys bar. Öitkenı sūranysy tömen mamandyqqa oqyp, jūmys taba almai otyrǧannan belgılı bır käsıptı meŋgerıp, öz ısınıŋ şeberı atanyp, ömırde öz jolyn tapqanyn qalaityn jastar köp…
