Тәуелсіздігіміздің жиырма бес жылдық мерекесіне орай кеше Ресейдің бас қаласы Мәскеуде Астананың мәдени күндері басталды. Онда қала тұрғындары екі күн бойы халқымыздың бай мұрасымен танысып, ұлттық өнердің тұнығынан сусындайды. Салтанатты шараға Астана әкімі Әсет Исекешев бастаған лауазымды тұлғалар мен еліміздің абыройын асырып жүрген өнер саңлақтары келді.
Ең алдымен Астана күндері ресми кездесуден басталды. Елорда әкімі Әсет Исекешев пен Мәскеу мэрі Сергей Собянин екі қала арасындағы байланыс туралы келелі әңгіме өрбітті.
– Біз үшін Мәскеудің мегаполисті дамыту бойынша бай тәжірибесі өте маңызды. Қазір біз Астананың даму тұғырнамасын қайта қараудамыз. Мақсатымыз – «Ақылды қала жобасы» аясында дамыту, қалада өмір сүрудің қолайлы жағдайларын жасау, жаңа технологияларды енгізу. Осы ретте Мәскеудің қалалық шаруашылықты басқару, көлік жүйесін басқарудағы тәжірибесімен, қала құрылысы саласындағы жетістіктермен және оның «ақылды қала» ретінде дамыту шараларымен танысуға ниеттіміз, – деді Астана әкімі Әсет Исекешев.
Жалпы, екі елдің бас қаласы арасындағы байланыс осы ғасырдан басынан бастау алады. Содан бері екі елорданың достығына ешқашан қылау түскен жоқ. Қайта жыл өткен сайын тамыры тереңдеп, керегесі кеңейіп келеді. Одан кейін Астана әкімі Әсет Исекешев пен Мәскеу қаласының Сыртқы экономикалық және халықаралық байланыстар департаментінің жетекшісі Сергей Черемин Мәскеудің орталық ірі көрме алаңында ежелгі көшпенділер дәуірінің болмысы мен келбетін көркемдеген қазақ ауылын аралады.
