«Нұрлы жүректегі» жылы жүздесу
Елорда әкімі Алтай Көлгінов «Нұрлы жүрек» әлеуметтік қызмет көрсету орталығында болып, мекеме қызметкерлерімен және балалармен кездесті.«Нұрлы жүректе» сал ауруына шалдыққан, эпилепсия, хромосомиялық аурулары мен аутизм диагнозы, Даун синдромы бар, ұштасқан сөйлеу қабілеті бұзылған, психикалық ауытқуы бар балаларды қоғамға бейімдей отырып, олардың ем-шара алуына барлық мүмкіндік жасалған. Сырқат деңгейіне қарай топтастырылған орталықтың үш корпусында қазіргі таңда 281 бала, оның ішінде 155-і – күндізгі бөлімде, 126-сы стационарда емделуде. Орталықта 300-ден аса маман жұмыс істейді.
– Сіздер игі әрі күрделі жұмыс атқарып, ерекше қажеттіліктері бар балаларға көмектесесіздер. Сіздерге алғысымды білдіремін, еңбектеріңізді бағалаймыз. Көптеген балалар көмек пен оңалтуды қажет етеді. Сондықтан қосымша корпус ашуды жоспарлап отырмыз. Сондай-ақ ерекше қажеттіліктері бар балаларға көмек көрсетумен айналысатын әлеуметтік сала қызметкерлеріне арналған жатақхана салу мәселесін қарастырамыз, – деді Алтай Көлгінов.
Әкім ерекше балалардың өнерін тамашалап, мекеме қызметкерлерімен бірге естелік суретке түсіп, сый-сияпатын табыс етті.
Қалада ерекше қажеттіліктері бар адамдардың саны 26 мың болса, оның 5,5 мыңы – балалар. Келесі жылдан бастап ҚР Президентінің тапсырмасына сәйкес осы салада еңбек етіп жүрген әлеуметтік қызметкерлерінің жалақысы 30 пайыздан бастап көтерілетін болады.