Қайырымдылық концерті
Елордада «Дегдар» қайырымдылық қоры мен «Қазақконцерт» мекемесі «Таңғажайып әуен» фестивалі аясында қайырымдылық кешін өткізді.Кеште балаларға арналған оперетта мен мюзиклдердің танымал ариялары шырқалды. Дариға Назарбаева, Медет Шотабаев, Мейір Байнеш, Әлфия Кәрімова, Азат Мәлік, Азамат Жылтыркөзов, «FORTE TRIO» тобы, «Астана Опера» театрының симфониялық оркестрі мен хоры, сондай-ақ дирижер Абзал Мұхитдинов меймандарға мерекелік көңіл күй сыйлады.
«Дегдар» қорының директоры Лаура Ахметованың айтуынша, былтыр осы фестиваль кезінде 52 миллион теңге қаражат жиналып, ол төрт ауылдық балалар үйі арасында бөлініпті.
– Биыл қайырымдылықтан түскен ақша ауылдық жерлердегі төрт балалар үйінің, атап айтсақ, Ақмола облысындағы балабақша-мектеп-интернаттың, Шығыс Қазақстан облысындағы №8 балалар үйінің, Қарағанды облысындағы жетім балалар мен ата-ана қамқорлығынсыз қалған балаларға арналған Литвинск мектеп-интернатының және Қостанай облысындағы орталық жүйке жүйесі зақымдалған және психикасы бұзылған балаларға арналған Рудный мамандандырылған балалар үйінің қажеттілігіне жұмсалады, – деді ол.
Қаражат сонымен қатар ерекше актерлер театрының жұмысын қолдауға да бағытталады.