Астана әкімі Әсет Исекешев 2-Жылу-энергия орталығына барып, бас қала тіршілігін қамтамасыз етіп отырған кәсіпорындар жұмысымен танысты. Елорда басшысы энергетиктердің табысты еңбегін атап өтіп, оларды кәсіби мерекелерімен құттықтады. Елбасының тапсырмасына сәйкес, Тәуелсіздіктің 25 жылдығына орай Астана әкімдігі бірқатар ауқымды энергетикалық жобалардың құрылысын аяқтады. Жүзеге асқан жаңа жобалар қаладағы жылу энергиясын 400 Гкал/сағ арттыруға мүмкіндік беріп, 4 млн шаршы метр тұрғын үйді және әлеуметтік нысандарды немесе 20 пайызға жуық тұрғын үй қорын жылумен қамтамасыз етуге жол ашты.
ЖАҢА ЭНЕРГЕТИКАЛЫҚ ЖОБАЛАР
– Энергетика саласы – кез келген мемлекеттің қуаты, экономиканың алтын жігі, өндірістің өзегі. Сіздердің қажырлы еңбектеріңіздің арқасында еліміздің әрбір шаңырағы жылу мен жарыққа бөленіп отыр. Сіздер жұмыс барысында кездесетін қиындықтарға қарамастан, өздеріңізге жүктелген міндетті абыроймен атқарып келесіздер.
Елбасының тапсырмасына сәйкес, Тәуелсіздіктің 25 жылдығына орай Астана әкімдігі бірқатар ауқымды энергетикалық жобалардың құрылысын аяқтады. Жүзеге асқан жаңа жобалар қаладағы жылу энергиясын 400 Гкал/сағ арттыруға мүмкіндік беріп, 4 млн шаршы метр тұрғын үйді және әлеуметтік нысандарды немесе 20 пайызға жуық тұрғын үй қорын жылумен қамтамасыз етуге жол ашты. Бұл өте үлкен өсім деп санаймын. Сондай-ақ, қалаға қосымша 180 Мгвт электр энергиясы келді. Жалпы ұзындығы 24,8 шақырымды құрайтын 4-інші кезектегі жылу магистралінің іске қосылуы «ЭКСПО» ауданы мен Орынбор, Тәуелсіздік даңғылдары бойындағы тұрғын үй кешендеріне, жаңа теміржол вокзалы аумағындағы үйлерге жылу мен электр қуатының, ыстық судың келуіне жағдай тудырды. Мұның бәрі ел, халық игілігі үшін атқарылды, – деді Әсет Исекешев.
Астана қаласы Энергетика басқармасының басшысы Бақтыбек Жапаевтың айтуынша, қалада электр энергиясы мен жылу сынды қуат көздерін арттыру жұмысы осымен тоқтамайды. «Былтыр да қалада 400 Гкал/сағ жылу энергиясын қосымша бергенбіз. Биыл бұл көрсеткішті қайталауға жетінші қазандық агрегаты мен бесінші-алтыншы су жылытатын қазандықтардың іске қосылуы мүмкіндік берді. Алдағы жылы 1-ЖЭО жаңғыртуды, қосымша 35 Гкал/сағ жылу энергиясын қосуды жоспарлап отырмыз. 2-ЖЭО-да алтыншы турбоагрегатын іске қосып, сол арқылы 120 Мгвт қосымша электр энергиясына қол жеткіземіз. 2018 жылы қалада 180 Гкал/сағ жылу энергиясы артып, 2019 жылы 2-ЖЭО жаңғырту мен кеңейтуді толық аяқтаймыз. 1-ЖЭО жаңғырту жұмыстары 2018 жылы толығымен аяқталмақ» дейді ол.
ЖАҢҒЫРТУ ЖҰМЫСТАРЫ ЖАЛҒАСУДА
Басқарма басшысы 3-ЖЭО құрылысы жөнінде де мәлімет берді. Оның сөзінше, бұл жоба елордаға тағы 400 Гкал/сағ жылу энергиясын береді. Осыншама энергия қаланың оң мен сол жағалауына 2018 жылы қосымша келмек.
«Бүгіндері басқарма мен бізге бағынышты «Астана-Теплотранзит» және «Астана-Энергия» компаниялары инвестициялық бағдарламаларды жүзеге асыруда. Ескірген жабдықтарды қалпына келтіру мен жаңасына ауыстыруды атқарып отырмыз. Атап айтсақ, 2015 жылға дейін магистралды жылу желілерінің 14 шақырымы ауыстырылды. Ал алдағы жылы олардың үш шақырымын ауыстыру және «ТМ-2», «ТМ-5», «ТМ-7», «ТМ-18», «ТМ-20», «ТМ-Байтұрсынов» сынды үлкен магистралдарды іске қосу, екі павильон құрылысын аяқтау жоспарланды» дейді Б.Жапаев.
Оның сөзіне сүйенсек, бүгінде қалада «Тұран», «Бәйтерек», «Самал» қосалқы стансалардың құрылысы жүргізілуде. Аталмыш стансалар оң және сол жағалауды электр энергиясымен толық жабдықтауға мүмкіндік береді. Сондай-ақ, қазір «Жаңа жол» және «Керамика» қосалқы стансалар қалпына келтірілуде.
Жаңа қосалқы стансалар жаңа коммуналдық базарды, жаңа теміржол вокзалын, «Мыңжылдық» аллеясын, «Абу-Даби Плаза» көп функционалды кешенін және «ЭКСПО-2017» көрмесін өткізуге қажет барша нысандарды жарықпен қамтамасыз етеді.
Қала энергетиктері өздеріне жүктелген міндетті табысты атқаруда. Мәселен, 4-інші кезектегі жылу магистралінің құрылысы рекордты кезеңде – 9 айда жүзеге асты. Бұл – жалпы ұзындығы 25 шақырымға жуық жылу желісі. Сондай-ақ, жаңа үш сорғы стансалары салынды.
ЕЛОРДАҒА ГАЗ КЕЛЕ МЕ?
Жалпы алғанда, қала жылына 2,5 млрд Квт/сағ электр қуатын және 5,5 млн Гкал/сағ жылу энергиясын тұтынады. Жылу энергиясымен елорда 90-95 пайызға қамтылған. 5-інші кезектегі жылу магистралі, яғни 3-ЖЭО 2018 жылы іске қосылғанда «Көктал» шағын ауданына толығымен орталықтандырылған жылу жүйесі келеді. Бұл дегеніміз – болашақта автономды қазандықтар орталық жылу жүйесіне және газ қазандықтарына ауыстырылады.
Бақтыбек Жапаевтың айтуынша, қалаға газ әкелу жобасының ішкі желілерінің техникалық-экономикалық негіздемесі әзірленді. Ал сыртқы желілерінің техникалық-экономикалық негіздемесін ҚР Энергетика министрлігі дайындап жатыр. Оның сөзінше, жақын 2-3 жылда газды қалаға әкелу, сәйкес желілердің құрылысын бастау жүзеге асырылуы тиіс.
ТАРИФТЕРІ ТӨМЕН ШАҺАР
Басқарма басшысы алдағы жарты жылдықта коммуналдық тарифтердің өспейтіндігін айтты. «Астана-Энергия», «Астана-Теплотранзит» және «Астана-РЭК» компаниялары инвестициялық бағдарламаларына сәйкес алдағы 5 жылдың тарифтерін Табиғи монополияларды реттеу және бәсекелестікті қорғау департаментінде қорғап шықты. Аталмыш компаниялар жыл сайын 1-0,5 пайызға желілердің ескіруін жоюда.
Жалпы ел бойынша алатын болсақ, Астанада коммуналдық тарифтер өзге өңірлермен салыстырғанда төмен. «Бүгіндері электр энергиясы бойынша 8-орында тұрмыз.
Ал жылу энергиясы көрсеткішінен, тіпті, 13-орындамыз. Ыстық судан – 10, суық судан 10-12-орындамыз» дейді Б.Жапаев.
Кәсіби мерекеге байланысты өткен салтанатты жиында қалалық Энергетика басқармасының басшысы Бақтыбек Жапаевқа Астана әкімінің грамотасы табысталды. «Астана-Энергосервис», «Астана-Энергия», «Астана-Теплотранзит», «Астана-РЭК» ұжымдарына қала басшысының Алғыс хаты берілді.
«Астана-Энергосервис» АҚ басқарма төрағасы Еркеғали Есенжолов сөз сөйлеп, Астана әкіміне алғысын жеткізіп, энергетиктер қаланың көркеюіне бар күшін салатынын айтты.
Аманғали ҚАЛЖАНОВ
