Жабық алаңның орны анықталды
Еуропалық футбол қауымдастықтары одағы (УЕФА) өткен жылдың аяғында Астанада салынатын жабық футбол алаңы құрылысын қаржыландыру туралы шешім қабылдағаны белгілі. Алайда, оның қай жерде орналасатыны осы уақытқа дейін айтылмаған еді. Жақында Қазақстанның футбол федерациясы жаңа алаңның Бауыржан Момышұлы даңғылында орналасқан оқушылар сарайы жанынан бой көтеретінін хабарлады.
Астана қаласы әкімдігі осы аумақтан арнайы жер учаскесін бөлген. Ал УЕФА алаңның құрылысына 3,5 миллион евро бөлу жөнінде шешім қабылдаған. Қазақстан футбол федерациясының төрағасы Ерлан Қожағапановтың айтуынша, жабық алаңның алғашқы кірпішін ФИФА-ның жаңа президенті Джанни Инфантино келіп қалауы тиіс екен. Қазіргі уақытта УЕФА мен Қазақстан футбол федерациясы арасында келісімшарттарды пысықтау шаралары жүріп жатса керек. Одан соң, құрылысты жүргізетін мердігер компания анықталады. Осы аралықта, яғни, алдағы сәуір айының басына дейін көптен күткен мәртебелі мейман Д.Инфантино да келмек.
Болашақ жабық футбол алаңы Астананың ең қолайлы жерінде орналаспақшы. Қаланың екі жағалауынан да оған қатынау ыңғайлы. Жобаны жүзеге асыруға УЕФА «Хет-Трик» бағдарламасы аясында қаржылық қолдау көрсетеді. Астана қаласы әкімдігі де өз тарапынан қаржылық және басқа да көмектер жасайтын болады. Жоспар бойынша жабық алаң жыл аяғына дейін пайдалануға берілмек.
Меңдолла НҰРЫМҰЛЫ
Материалды “Астана ақшамы” газетінің astana-akshamy.kz ресми сайтына сілтеме жасағанда ғана пайдалануға рұқсат етіледі.