«Гүл өссе жердің көркі» дегендей, жақында гүл егу науқаны басталады. Көшелерді қызылды-жасылды гүлмен көмкеру әсем шаһардың шырайына шырай қосып, әдемілігін әрлей түсетіні анық.
«Астана-Зеленстрой» мекемесінің жылыжайына арнайы барып, мамандардан қаланың қалай гүлденетінін сұрап білдік. Аталмыш компанияның бас агрономы Бақтияр Шаймұханбетов пен гүл өсіруші Мария Царева өздерінің жұмыстары жайлы кеңінен әңгімеледі. Олардың сөзіне сүйенсек, биылғы маусымда қаладағы гүл бақтары мен саябақтарға, көшелерге, жолдардың жиектеріне 5,5 млн түп гүл егіледі. Осыншама гүл қаланың 15-16 гектар жерін қамтиды екен.
– Гүл көшеттерін отырғызу науқанын мамырдың 20-нан бастауды жоспарлап отырмыз. Биылғы науқанды ауа райының қолайсыздығына байланысты жылдағы уақыттан шамамен 5-7 күнге кештеу бастаймыз. Өткен жылмен салыстырғанда үйреншікті пайдаланылатын гүл түрлерінен бөлек миксбордер отырғызу техникасы қолданылады. Бұл – өзіндік күрделі көпқатарлы және көпқабатты отырғызылған өсімдіктерден тұратын, ерте көктемнен бастап қоңыр күзге дейін үздіксіз гүлденуді қамтамасыз ететін гүл бағы. Сонымен қатар биыл бірнеше жаңа раушангүл сұрыптарын қолданысқа енгізу ойымызда бар, – дейді Бақтияр Шаймұханбетов.
Бас агрономның айтуынша, қаладағы гүлзарларға биыл да әдеттегіше петунья, тагетес, остеоспермум, пеларгония, портулак, львинный зев сияқты бір жылдық гүлдердің 50-ден аса түрі мен хоста, бөлінген рудбекия, эшольция, бақша түймедағы, бақша пионы, лилейлы, ірі гүлді кореопсис, қоңырау гүлтығыз сынды көпжылдық гүлдердің 30-дан аса түрі егілмек. Қазіргі уақытта жылыжайда 90 адам жұмыс істейді. Олар жеті күн бойы таңғы сағат 7-ден кешкі 7-ге дейін гүл көшеттерінің күтімімен айналысуда. Ал гүлдендіру маусымындағы қызу науқан кезінде шамамен мыңға жуық жұмысшы жұмылдырылмақ. Егу науқаны маусым айының соңына дейін созылатынын айтады мамандар.
