Алматы облысы
Облыста қымыз өндірісі жылдан-жылға өркендеп келеді. Жетісу жеріндегі шаруалар биыл 800 тонна қымыз өндірген. 700 тонна қымыздың әр литріне 60 теңгеден субсидия берілді. Ал жылқы саны өткен жылмен салыстырғанда 354 мың 600 басқа жетті.
Түркістан облысы
Ордабасыдағы тауарлы сүт фермасы Нидерланд елінен әкелінген робот-сауыншылармен жабдықталып жатыр. Бастапқыда сауыншыны құлтемір алмастырған, енді сиырлардың жем-шөбін де робот реттейтін болады. Бүгінде өз өнімдерін өңдеуге көшкен өндірістің сүт зауыты тағы бар.
Атырау облысы
Атырау облысында шалғайдағы елді мекендерді газдандыру бойынша белсенді жұмыстар жүріп жатыр. Жобаның жалпы құны – 10 млрд теңге. Жоба аясында алыс орналасқан елді мекендерге ұзындығы 365 шақырым магистралдық газ құбырын төсеу жоспарлануда. Бүгінгі таңда 274 шақырым газ құбыры желісі жүргізілді.
Қызылорда облысы
Жақын күндерде жылына 4 мың тоннаны құрайтын балық зауыты іске қосылады. Өңірдің индустриалдық-инновациялық даму жоспарында жарияланғандай, кәсіпорын құны 160 млн теңгені құрады. Зауытта 100 адам жұмысқа тартылатын болады.
Қостанай облысы
Қостанай облысы әкімдігі Челябі облысының қазақ диаспорасына көмек көрсету, ана тілін үйретуде ұйымдастырушылық-әдістемелік көмек көрсету мақсатында дөңгелек үстел жиынын өткізді.
Маңғыстау облысы
Ақтауда 50-ден астам цифрлық жобалар қолданысқа қосылады. Олардың қатарында бірегей диспетчерлік қызмет, смарт-аялдамалар мен «қағазсыз» медициналық қызмет көрсету кешендері бар. Автобус аялдамаларына жылу және ауа баптау жүйелері орнатылып, қоғамдық көлік кестесі жазылған цифрлық ақпарат тақталары ілінеді.
Шығыс Қазақстан облысы
Абай ауданының орталығы – Қарауыл аулында ойшыл, ғұлама, ақын Шәкәрім Құдайбердіұлының 160 жылдық мерейтойы кеңінен аталып өтті.
