قالالىق ءماسليحاتتىڭ كەزەكتى سەسسياسىندا استانانىڭ ەنەرگەتيكا كاسىپورىندارىنىڭ تيىمدىلىگىن دامىتۋ جانە ارتتىرۋ ماسەلەلەرى قاراستىرىلماقشى. وسىعان وراي, حالىق قالاۋلىلارى باس قالاداعى بىرقاتار ەنەرگەتيكا كەشەندەرىندە بولىپ, ولاردىڭ كەلەشەكتەگى دامۋ جوسپارلارىمەن تانىستى.
الدىمەن «استانا-تەپلوترانزيت» اق-نىڭ №1 سورعى ستانساسىنا ات باسىن بۇرعان دەپۋتاتتار بيۋدجەت قاراجاتىنا سالىنعان قۇرىلعىنىڭ جۇمىسىمەن تانىستى. اكتسيونەرلىك قوعامنىڭ باسقارما توراعاسى ايتمۇقان جۇمابەكوۆتىڭ ايتۋىنشا, «استانا-تەپلوترانزيت» ءوندىرىس ورتاسىنان تۇتىنۋشىعا دەيىن جىلۋ قۋاتى 10 سورعى ستانساسى مەن ۇزىندىعى 566 كم جىلۋ جەلىلەرىنىڭ كومەگىمەن جەتكىزىلەدى. زاماناۋي قۇرىلعىلارمەن, اۆتوماتاتتى باسقارۋ جۇيەسىنىڭ باعدارلامالىق-تەحنيكالىق كەشەنىمەن جابدىقتالعان ستانسا ەلوردانىڭ وڭ جاعالاۋىنداعى جەڭىس, رەسپۋبليكا داڭعىلدارى مەن ءۋاليحانوۆ, كەنەسارى كوشەلەرىندەگى تۇرعىن ۇيلەردى جىلۋمەن قامتاماسىز ەتەدى.
حالىق قالاۋلىلارى سونىمەن بىرگە جەو-2 جانە جەو-3 نىساندارىنا بارىپ, ونداعى قۇرىلىس بارىسىمەن جانە ەلورداداعى قۋات كوزدەرىن دامىتۋ جونىندەگى جوبالار مەن باعدارلامالاردىڭ جۇزەگە اسىرىلۋ جايىمەن تانىستى. جەو-3 قۇرىلىسى 2010 جىلى تامىز ايىندا باستالدى. جوبا بويىنشا مۇندا قۋاتى 480 گكال ءتورت سۋ قايناتاتىن قازاندىقتىڭ جانە بارلىق ينفراقۇرىلىمىنىڭ قۇرىلىسى قاراستىرىلعان بولاتىن.
«استانا-رەك» نەمەسە استانا ايماقارالىق ەنەرگەتيكالىق كومپانياسىنا قاراستى «كوكتەم-2» جانە «باتىس» ارالىق ستانسالارىن ارالاۋ بارىسىندا دەپۋتاتتار ەلەكتر ەنەرگياسىن تاراتۋمەن اينالىساتىن مەكەمەنىڭ جۇمىسىمەن جاقىنىراق تانىسۋعا مۇمكىندىك الدى. بۇل رەتتە «استانا-رەك» اق باسقارما توراعاسى الەكساندر سمورودين كاسىپورىن قىزمەتىن دامىتىپ, قالانىڭ ەلەكتر شارۋاشىلىعىن پايدالانۋ تيىمدىلىگىن ارتتىرۋ مەن تەحنيكالىق قىزمەت كورسەتۋ شارالارى تۋرالى جانە كاسىپورىندا كۇردەلى جوندەۋ باعدارلاماسى, ينۆەستيتسيالىق باعدارلامالار شەڭبەرىندە جۇرگىزىلگەن قوسالقى ستانسالار مەن ەلەكتر بەرۋ جەلىلەرىن قايتا قۇرىلىمداۋ جۇمىستارى جونىندە باياندادى.
ال, «استاناەنەرگوسەرۆيس» اق باسقارما توراعاسى رۋستام باياليەۆ قالاداعى ەنەرگەتيكا كەشەنىنىڭ جاي-كۇيى مەن دامۋى جايىندا ايتتى. وسى جىلى باسقارۋ كومپانيانىڭ شوعىرلاندىرعان اكتيۆتەرى 153 ملرد تەڭگەنى قۇراعان ەكەن. 2009 جىلدان 2013 جىلعا دەيىن ءتاريفتىڭ شەكتەۋلى دەڭگەيىنىڭ ءوسۋى ارقىلى 15,3 ملرد تەڭگەنىڭ ينۆەستيتسيالىق باعدارلاماسى جۇزەگە اسىرىلعان. بۇدان ءارى حولدينگ باسشىسى ەنەرگەتيكا كەشەنىنىڭ قۇرامىندا قۇرىلعان ەنەرگيامەن جابدىقتاۋشى «استانا ەنەرگوسبىت» كومپانياسىنىڭ جۇمىسىنا ەرەكشە توقتالا وتىرىپ, ەلباسى تاپسىرماسىنا سايكەس ەلەكتروندىق فورماتتا كورسەتىلەتىن قىزمەتتەر سانىن كوبەيتىپ, كوممۋنالدىق قىزمەتتەر اقىسىن بىرىڭعاي تولەم قۇجاتتارى ارقىلى تولەۋدى قامتاماسىز ەتۋ ءۇشىن جۇمىس توبى قۇرىلعانىن جەتكىزدى.
«استانا-ەنەرگيا» اق باسقارما توراعاسىنىڭ ءبىرىنشى ورىنباسارى ولەگ ۋتكين قالانىڭ نەگىزگى ەنەرگيا وندىرەتىن ۇيىمىنىڭ جۇمىسى تۋرالى اڭگىمەلەسەدى. سونىمەن, حالىق قالاۋلىلارى سوڭعى كەزدە ەنەرگەتيكالىق نىساندار قىزمەتىنىڭ جاقسارعانىن ءوز كوزدەرىمەن كورىپ, بۇل سالاداعى وڭ وزگەرىستەرگە كۋا بولدى.
