بيىل ەلوردادا 6 مىڭعا جۋىق وقۋشى مەكتەپتى ءتامامدايدى. ولاردىڭ 275-ءى «التىن بەلگىگە» ۇمىتكەر اتانىپ وتىر. ەمتيحانداردان سوڭ, ءبىلىم ورداسىنا تارىداي بولىپ كىرگەن بالالار ءتالىم بەرگەن ۇستازدارىمەن قوشتاسىپ, ۇلكەن ومىرگە قادام باسپاق.
استانا قالاسى ءبىلىم باسقارماسىنىڭ تاراتقان مالىمەتى بويىنشا, بيىل مەكتەپ ءبىتىرۋ كەشى جالپىقالالىق دەڭگەيدە بولمايدى. ءبىر اپتا بۇرىن بارلىق مەكتەپتەردە اتتەستات تابىستالدى. «24 مامىر كۇنى ءداستۇر بويىنشا حالىقارالىق, رەسپۋبليكالىق وليمپيادالاردىڭ جانە عىلىمي جوبالاردىڭ جەڭىمپازدارىنا ارنالعان «تريۋمف» بالىن وتكىزەمىز. ال ماۋسىم ايىنىڭ سوڭىندا «التىن بەلگى» يەگەرلەرىن «ەلوردا ماقتانىشى» سالتاناتىندا ماراپاتتايتىن بولامىز» دەدى باسقارمانىڭ ءباسپاسوز حاتشىسى جازيرا اسانوۆا.
سونداي-اق, ءبىلىم باسقارماسى مەكتەپ ءبىتىرۋ كەشىنە قويىلاتىن تالاپتار تۋرالى مالىمەت بەردى. «ەشقانداي تالاپ جوق. كەشتى قاي جەردە قالاي وتكىزەتىنىن بالالاردىڭ اكە-شەشەسى بىرىگىپ شەشەدى. مەكتەپ باسشىلىعى كەشتىڭ بولاتىن جەرى مەن ۋاقىتىن بەلگىلەگەندە, ءبىز كەستەگە سايكەس مۇعالىمدەر مەن ينسپەكتورلاردى كەزەكشىلىككە قويامىز» دەدى ج.اسانوۆا.
باسقارما باسشىلىعى مەكتەپتىڭ اكت زالى مەن سپورت زالى سوڭعى قوشتاسۋ كەشىن وتكىزۋگە ەڭ قولايلى جەر دەپ سانايدى.
– ەگەر عيمارات سالتاناتتى شارانى وتكىزۋگە قولايلى بولسا, اتا-انانىڭ دا قالتاسى قاعىلمايدى. كەيدە بەلگىلى ءبىر سەبەپتەرگە بايلانىستى سالتاناتتى كەشتى وتكىزۋگە جاعداي بولا بەرمەيدى. سول كەزدە اتا-انا قاۋىمى مەرەكەنى اتاپ ءوتۋدىڭ باسقا امالدارىن قاراستىرادى, – دەپ جاۋاپ بەردى وسى رەتتە باسقارما وكىلى.
ەلىمىزدە ءبىلىم ۇياسىنان تۇلەپ ۇشقان تۇلەكتەر ۇستازدار مەن ديرەكتورعا ەستەلىك سىيلىقتارىن تابىس ەتۋى جىل سايىنعى داستۇرگە اينالعان. وسى رەتتە قالالىق ءبىلىم باسقارماسى اتا-انالارعا باعالى سىيلىقتاردى اكەلمەۋدى سۇرايدى. «ءبىز ءار جينالىستا ءبىلىم ورداسىنىڭ باسشىلىعى مەن ۇستازدارعا باعالى سىيلىقتاردى قابىلداماۋدى وتىنەمىز. مەكتەپ پەن بالاباقشالاردا دا اتا-انالاردى جيناپ, سىيلىققا دەپ ەشقانداي اقشا قورىن اشپاۋدى وتىنەمىز. وقۋشىلار تەك ىقىلاس گۇلىمەن شەكتەلسە ەكەن دەيمىز. سەبەبى ۇستاز ءۇشىن ەڭ باعالى سىيلىق – العىس» دەپ مەكەمە ءوز ۇستانىمىن ءبىلدىردى.
