ەلوردانى ەڭسەلى ەتكەن عاجايىپ عيماراتتاردىڭ ىشىندە ساۋلەتىنە كوز سۇيسىنەتىن سپورت نىساندارىنىڭ الار ورنى ورنى ايرىقشا. باس شاھاردىڭ سپورت قالاسى اتانۋىنا ۇلەسى وراسان بۇل كەشەندەر حالىقتى سالاماتتى ءومىر سالتىنا باستاپ كەلەدى.
ۆەلوشاباندوزدىڭ شلەمى تارىزدەس «سارىارقا» ۆەلوترەگى سىرتقى كورىنىسى ايتىپ تۇرعانداي, نەگىزىنەن, ۆەلوسپورتتى دامىتۋعا ارنالىپ سالىنعان. ۆەلوترەك – سپورتتىڭ بۇل تۇرىنەن عانا ەمەس, بوكستان, باسكەتبولدان, كوركەم گيمناستيكادان جانە دزيۋدودان جارىستار وتكىزۋگە ىڭعايلى امبەباپ كەشەن. سونداي-اق, 2011 جىلى قىسقى ازيا ويىندارى كەزىندە بۇل عيماراتتىڭ مۇز ايدىنىندا شورت-ترەكتەن جانە مانەرلەپ سىرعاناۋدان سايىستار ءوتتى. بۇعان قوسا, مۇندا ۆولەيبول, فۋتبول الاڭدارى مەن باسسەين جانە فيتنەس-ورتالىق بار.
قۇرىلىسى 2009 جىلدان باستالعان نىسان 2011 جىلى پايدالانۋعا بەرىلدى. ساۋلەتى الابوتەن كەشەن جۇرتتىڭ نازارىن بىردەن اۋدارادى. عيمارات اشىلعان جىلى-اق الەم ۇزدىگى دەپ تانىلدى.
بۇل كەشەندە وتەتىن ءىس-شارالاردى ءبىر مەزەتتە 9270 ادامعا دەيىن تاماشالاي الادى. ۆەلوسپورتقا ارنالعان كەشەننىڭ ىشىندەگى ترەكتىڭ ۇزىندىعى 250 مەتر بولسا, ەنى – 7 مەتر.
«سارىارقا» – «Pro Team Astana» ۆەلوكومانداسى مەن «استانا» باسكەتبول كلۋبىنىڭ نەگىزگى الاڭدارى.
استاناداعى ايشىقتى عيماراتتاردىڭ قاتارىن ارتتىرعان «بارىس ارەنا» مۇز سارايى 2015 جىلدىڭ 8 تامىزىندا پرەزيدەنت نۇرسۇلتان نازارباەۆتىڭ قاتىسۋىمەن اشىلدى.
بۇل كەشەن – قۇرلىقتىق حوككەي ليگاسىندا ويناپ جۇرگەن جەرگىلىكتى «بارىس» كومانداسىنىڭ نەگىزگى ارەناسى. 2011 جىلى قحل كوميسسياسى «بارىستىڭ» بۇرىنعى ايدىنى «قازاقستان» سپورت سارايىندا ماتچ وتكىزۋ ليگانىڭ جاڭا تەحنيكالىق رەگلامەنتىنە سايكەس كەلمەيتىنىن مالىمدەدى. سودان باستاپ جاڭا ارەنا تۇرعىزۋ تۋرالى شەشىم قابىلدانىپ, 2012 جىلى قۇرىلىس جۇمىستارى باستالىپ كەتتى.
جوبانىڭ ارحيتەكتورى – «IT Engineering S.A.» جوبالاۋ كومپانياسى. ارەنا ءبىر ساتتە 12000-عا دەيىن كورەرمەن سىيدىرا الادى. جالپى اۋماعى 86 مىڭ شارشى مەتردى الىپ جاتىر. كوپ فۋنكتسيالى كەشەندە 2 مۇز ايدىنىنا قوسا, 50 مەترلىك وليمپيادالىق باسسەينى مەن كوركەم جۇزۋگە ارنالعان باسسەينى بار. سونىمەن قاتار, سپورت سارايىندا باسقا دا مەرەكەلىك مادەني ءىس-شارالاردى وتكىزۋگە بولادى.
