ەلىمىزدىڭ ءارتۇرلى ايماعىندا سۋ تاسقىنى قاۋپى ارتقاندا «استاناعا دا توپان سۋدان قاۋىپ ءتونىپ تۇر» دەگەن الىپقاشپا اڭگىمەلەر الەۋمەتتىك جەلىدە تاراعانى ءمالىم. وسىعان وراي, استانا قالاسىنان سايلانعان سەناتور بيبىگۇل جەكسەنباي ءوز ارىپتەستەرى گالياسكار سارىباەۆ پەن اليشەر ساتۆالديەۆپەن بىرگە قالا سىرتىنداعى گيدروتەحنيكا نىسانىنا بارىپ, سۋ قويمالارىنداعى احۋالمەن تانىستى. سەناتورلار قازىر قالاعا كەلەتىن سۋ كولەمى بىرتىندەپ ازايا باستاعانىن ايتادى.
«استانا قالاسى ارقىلى تاسقىن سۋلارىن وتكىزۋگە جانە ىقتيمال سۋ تاسقىنىنان قورعاۋعا ارنالعان «استانا» قارسى رەتتەۋىشى نىساننىڭ جاعدايىن ءوز كوزىمىزبەن كوردىك. بارلىعى تولىققاندى باقىلاۋدا, رەتتەگىش دەڭگەيىنە سايكەس جۇمىس ىستەپ تۇر. استانا كونتررەگۋلياتورى قازىر سەكۋندىنا 30 تەكشە مەتر سۋدى جىبەرۋدە. قارسى رەتتەگىشكە تۇسەتىن سۋ سەكۋندىنا 248 تەكشە مەتردى قۇرايدى. بۇگىنگى تاڭدا قارسى رەتتەگىشتىڭ اعىزۋىن 40 تەكشە مەترگە دەيىن جەتكىزۋ جوسپارلانۋدا. سونداي-اق استانا قالاسى مەن اقمولا وبلىسىنىڭ اكىمدىكتەرى بىرلەسىپ, جاقىن ماڭداعى ەلدى مەكەندەر مەن قالانى سۋ باسۋىنىڭ الدىن الۋدا» دەيدى ب.جەكسەنباي.
سەنات دەپۋتاتى اقمولا وبلىسىندا استانا سۋ قويماسىن تولتىرۋ 99,6 پايىزدى قۇراعانىن, بۇل ەلوردا تۇرعىندارىن جىل بويى اۋىز سۋمەن قامتاماسىز ەتۋگە, سونداي-اق ەسىل وزەنىنىڭ گيدرولوگيا جاعدايىن جاقسارتۋعا مۇمكىندىك بەرەتىنىن ءمالىم ەتتى.
«استانا سۋ قويماسىنداعى وزەننىڭ وتكەن جىلعى كولەمى قالانى اۋىز سۋمەن تولىق قامتاماسىز ەتە الماعاندىقتان, سۋ قويماسىن ساتباەۆ كانالى ارقىلى تولتىرۋ قاجەت بولعان ەدى. بيىل كوكتەمگى سۋ تاسقىنى سۋ قويمالارىن تولىققاندى قامتاماسىز ەتۋگە مۇمكىندىك بەرىپ وتىر. تابيعي سىناق تەك ساباق قانا ەمەس, ەرتەڭگى كۇنگە قايىرلى بولىپ, جاز كەزىندە سۋ تاپشىلىعىنىڭ الدىن الۋعا مۇمكىندىك تە بەرەدى دەپ سەنەيىك» دەدى ول.
