استانا قالاسى سانيتاريالىق-ەپيدەميولوگيالىق باقىلاۋ دەپارتامەنتىندە اپۆ-عا قارسى ۆاكتسيناتسيانى ەنگىزۋ ماسەلەسى بويىنشا جۇمىس كەڭەسى ءوتتى, دەپ حابارلايدى astana-akshamy.kz
ادام پاپيللوماۆيرۋسى (اپۆ) – بۇل ءارتۇرلى مۇشەلەردىڭ تەرىسى مەن شىرىشتى قابىعىنا اسەر ەتەتىن ۆيرۋستار توبى. ۆيرۋس تەز تارالىپ, جاسۋشالاردىڭ قاتەرلى ىسىگىنىڭ دەگراداتسياسى مەن قاتەرلى ىسىكتىڭ قوزدىرعىشى بولاتىنىمەن قاۋىپتى.
قازاقستاندا جاتىر موينى وبىرى 25 جاستان 40 جاسقا دەيىنگى ايەلدەردە تارالۋى بويىنشا ەكىنشى ورىندا. جىل سايىن قاتەرلى ىسىكتىڭ وسى ءتۇرىنىڭ 1 900-دەن استام جاعدايى انىقتالادى.
بۇل تۋرالى ەلوردانىڭ باس سانيتاريالىق دارىگەرىنىڭ ورىنباسارى جاننا پىراليەۆا اپۆ-عا قارسى ۆاكتسيناتسيانى ەنگىزۋ ماسەلەسى بويىنشا جۇمىس كەڭەسىندە ايتتى.
ال قوعامدىق دەنساۋلىق ساقتاۋ باسقارماسىنىڭ باسشىسى ءاليا رۇستەموۆا اپۆ الدىن الۋدىڭ جالعىز ءادىسى ۆاكتسيناتسيا ەكەنىن اتاپ ءوتتى. اپۆ ۆاكتسيناسى 15 جىلدان استام ۋاقىت بويى الەمنىڭ 135 ەلىندە قولدانىلىپ كەلەدى.
ددۇ مالىمەتتەرى بويىنشا, 4 ەلدە اپۆ ۆاكتسيناتسياسىن ەنگىزگەننەن كەيىن اۋرۋدىڭ تارالۋى ايتارلىقتاي تومەندەدى. ايتا كەتسەك, اعىمداعى جىلدىڭ كۇزىندە قازاقستاندا 11 جاستاعى قىزدارعا اپۆ-عا قارسى ۆاكتسيناتسيانى باستاۋ جوسپارلانۋدا.
كەڭەس قورىتىندىسى بويىنشا 11 جاستاعى قىزدار اراسىندا اپۆ-عا قارسى ۆاكتسيناتسيالاۋدىڭ جۇرگىزۋگە جانە اۋرۋدىڭ الدىن الۋعا باعىتتالعان ءىس-شارالار جوسپارى جاسالدى.
