پارلامەنت ءماجىلىسىنىڭ دەپۋتاتتارى ساعادات نۇرماعامبەتوۆ اتىنداعى اسكەري كوللەدجدە بولدى, دەپ حابارلايدى astana-akshamy.kz
كەڭەس وداعىنىڭ باتىرى, حالىق قاھارمانى ارميا گەنەرالى ساعادات نۇرماعامبەتوۆ اتىنداعى اسكەري كوللەدجدە پارلامەنت ءماجىلىسىنىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ كوشپەلى وتىرىسى ءوتىپ, وندا اسكەري ورتا ءبىلىم بەرۋ جۇيەسىن دامىتۋ پەرسپەكتيۆالارى تالقىلاندى.
بيىلعى جىلى اسكەري وقۋ ورنىنان كاسىبي سەرجانتتاردىڭ العاشقى لەگى قانات قاعادى. ساربازدىڭ جاۋىنگەرلىك داعدىلارى, اسكەري ءتارتىبى جانە بولىمشەدەگى مورالدىق-جاۋىنگەرلىك رۋحى كوبىنە سەرجانتتاردىڭ دايىندىعىنا بايلانىستى.
كوميتەت وتىرىسى ۇلى وتان سوعىسىنىڭ باتىرى, حالىق قاھارمانى جانە ەگەمەندى ەلىمىزدىڭ العاشقى قورعانىس ءمينيسترى ارميا گەنەرالى ساعادات قوجاحمەتۇلى نۇرماعامبەتوۆتىڭ تۋعانىنا 100 جىل تولۋىنا ورايلاستىرىلدى.
قورعانىس مينيسترلىگىنىڭ اسكەري ورتا ءبىلىم بەرۋ جۇيەسى ەلدىڭ نورماتيۆتىك-قۇقىقتىق جانە وقۋ-ادىستەمەلىك الاڭىمەن بىرىڭعاي جۇمىس ىستەيدى جانە بۇل وقىتۋ جۇيەسىنە ەكى اسكەري كوللەدج بەن ءۇش «جاس ۇلان» رەسپۋبليكالىق مەكتەبى كىرەدى.
قازىرگى ۋاقىتتا قر قارۋلى كۇشتەرىنىڭ اسكەري ءبىلىم مەن عىلىمدى دامىتۋ تۇجىرىمداماسىنا سايكەس 2030 جىلعا دەيىن ۆەدومستۆولىق باعىنىستى مەكتەپتەردى اسكەري كوللەدجدەر رەتىندە كەزەڭ-كەزەڭىمەن قايتا قۇرۋ جۇمىستارى جۇرگىزىلۋدە, بۇل ولاردىڭ كاسىبي سەرجانتتارمەن جاساقتالۋىن ارتتىرۋعا جانە ماماندىقتار اۋقىمىن ەداۋىر كەڭەيتۋگە مۇمكىندىك بەرەدى.
دەپۋتاتتار اسكەري كوللەدجدىڭ ينفراقۇرىلىمىمەن تانىسىپ, پەداگوگتارمەن, ۇلاندارمەن, كادەتتەرمەن كەزدەستى. كەزدەسۋ بارىسىندا ۇزدىك وقۋشىلارعا پارلامەنت ماجىلىسىنە ەكسكۋرسيا ۇيىمداستىرۋ تۋرالى ۇسىنىس قولداۋ تاپتى.
– ءبىزدىڭ كوميتەت اسكەري قىزمەتشىلەردى الەۋمەتتىك قامسىزداندىرۋعا ەرەكشە كوڭىل بولەدى. ءبىز كوللەدجدىڭ وقۋ-ماتەريالدىق بازاسىمەن, ءبىلىم الۋشى ۇلانداردىڭ تۇرمىسىمەن تانىستىق, – دەدى پارلامەنت ءماجىلىسىنىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ ءتورايىمى ايگۇل قۇسپان. – ودان وزگە بىزگە نازاردان تىس قالدىرۋعا بولمايتىن جانە ولاردى شەشۋ بويىنشا شارالار قابىلدانۋ ءتيىس پروبلەمالار دا ايتىلدى.
بۇعان قوسا ول كوميتەتتىڭ قاراۋىندا ارميانىڭ ءيميدجىن جانە اسكەري كاسىپتىڭ بەدەلىن ارتتىرۋعا باعىتتالعان اسكەري-پاتريوتتىق تاربيە ماسەلەلەرى جونىندەگى زاڭ جوباسى بار ەكەنىن, وعان تۇزەتۋلەر ەنگىزۋ كوزدەلەتىنىن مالىمدەدى.
ساپار سوڭىندا ءماجىلىس دەپۋتاتتارى كادەتتەرمەن بىرگە كوللەدج اۋماعىنا شىرشا اعاشتارىن وتىرعىزدى.
