ەلوردالىق «103» جەدەل جاردەم قىزمەتىنە كۇن سايىن 2000-عا جۋىق شاقىرتۋ تۇسەدى. باس اۋىرسا دا, قىزۋى كوتەرىلسە دە, ءتىپتى, تۇشكىرىپ مازاسى قاشسا دا, دەرەۋ تەلەفون تۇتقاسىنا جۇگىرەتىندەر كوپ. ياعني, ولاردىڭ 60%-عا جۋىعى «جەدەل» شاقىرتۋعا جاتپايدى. مەكەمە قىزمەتكەرلەرى «استانا اقشامى» گازەتىنە حالىق تەك شۇعىل كومەك كەرەك بولعان كەزدە عانا مەديتسينالىق كومەككە جۇگىنسە ەكەن دەگەن تىلەگىن جەتكىزدى.
ءبىر مينۋتتا – ەكى شاقىرتۋ
اۋەزوۆ كوشەسىندەگى ىرگەسى ەرتەرەكتە قالانعان «103» عيماراتىنا قالا تۇرعىندارى ءسات سايىن حابارلاسادى. جەدەل كومەكتەن بولەك, تەلەفون ارقىلى ءتيىستى مامانداردان دارىگەرلىك كەڭەس الۋ ءۇشىن دە جۇگىنەتىندەر كوپ. ال, تاۋلىك بويى جەدەل كومەك بەرۋگە شىعاتىن ارناۋلى بريگادا توبى ساقاداي-ساي.
«شاقىرتۋلاردىڭ كوبى كەشكى ساعات 18.00-دەن تۇنگى 23.00-گە دەيىنگى ارالىقتا بولادى. مەكەمەگە ءبىر مينۋتتا ەكى شاقىرتۋ كەلەدى. ءبىزدىڭ ماماندار ەڭ الدىمەن جول اپاتىنا ءتۇسىپ, ءومىر مەن ءولىم اراسىندا جاتقان جاندارعا بارادى. ونىڭ ۇستىنە, قازىر جاڭا وقۋ جىلى باستالدى. بالالاردىڭ وقىس جاراقات الۋى كوبەيەتىن كەزەڭ. سوندىقتان بريگادا تىنىمسىز جۇمىس ىستەيدى. ولار تاۋلىگىنە 1500-1600 شاقىرتۋعا بارىپ, ءوز مىندەتتەرىن ورىنداپ ءجۇر» دەيدى قالالىق جەدەل جاردەم ستانساسىنىڭ باس دارىگەرى ساپاربەك دۇيسەنوۆ.
اعىمداعى جىلدىڭ 1 تامىزىنان باستاپ قالالىق 9 ەمحانا بازاسىندا شۇعىل مەديتسينالىق كومەك كورسەتەتىن بولىمدەر قۇرىلدى. مۇنداي بولىمدەردىڭ ايىرماشىلىعى, تەك 4,5 جانە 6 ساناتتتاعى پاتسيەنتتەرگە جەدەل كومەك بەرەدى. بۇگىندە قالا بويىنشا 14 قوسالقى ستانتسيا بار. ونىڭ 4-ەۋى – ەسىل, 4-ەۋى – سارىارقا جانە 6-ۋى الماتى اۋدانىندا ورنالاسقان. وسىلايشا, اتالمىش بولىمدەردىڭ ارقاسىندا مەديتسينالىق كومەككە مۇقتاج جاندارعا ورتاشا ەسەپپەن 10 مينۋتتا كەلىپ-كەتۋگە مۇمكىندىك مول.
سانات دەمەكشى, مۇندا شاقىرتۋلار 6 تۇرگە بولىنەدى. ماسەلەن, العاشقى ءۇش دەڭگەي – شۇعىل شاقىرتۋعا جاتادى. وعان اپاتقا ۇشىراعان نەمەسە ءولىم مەن ءومىردىڭ اراسىندا جاتقان جاندار كىرەدى. سونىمەن قاتار, اياعى اۋىر ايەلدەر مەن 1 جاسقا تولماعان بالالارعا دا الدىمەن كومەك كورسەتىلەدى.
جەدەل ءبولىمنىڭ جۇمىسى
ءبىز تەلەفون تۇتقاسىنا جاۋاپ بەرەتىن ارناۋلى بولمەگە باس سۇقتىق. ونشاقتى ادام ارنايى پۋلتتە وتىرىپ, كەلىپ تۇسكەن قوڭىراۋلارعا جاۋاپ بەرۋدە. تەلەفوندارعا دامىل جوق. ءبىرى بالاسىنىڭ قىزۋى كوتەرىلىپ شاقىرتسا, ەندى ءبىرى قان قىسىمىنىڭ كۇرت ءتۇسىپ كەتكەنىن ايتۋدا. كەلگەن قوڭىراۋلاردىڭ ءبارى اۆتوماتتى تۇردە تىركەلىپ, وڭدەلىپ وتىرادى. جاڭا جۇيەنىڭ ارقاسىندا مونيتور بەتىندە ءبارىن باقىلاپ وتىرۋعا مۇمكىندىك بار.
«ەڭ الدىمەن بەكىتىلگەن ەرەجەگە سايكەس, كەزەكشى كەلىپ تۇسكەن قوڭىراۋ ءنومىرىن انىقتاپ, سودان كەيىن ماسەلەسىن تىڭدايدى. بۇل كەرى بايلانىس ءۇشىن وتە قاجەت. ودان كەيىن مەكەن-جايىن ناقتىلايدى. ءدال وسى ماسەلە كەزەكشىلەرگە قيىندىق تۋدىرادى. كەيبىر تۇرعىندار ناقتى مەكەن-جايىن بىلمەيدى نەمەسە كوشە اتاۋلارىن شاتاستىرادى» دەيدى باس دارىگەردىڭ ادىستەمەلىك ۇيىمداستىرۋ جۇمىستارى بويىنشا ورىنباسارى گۇلنارا تۇياقوۆا. ونىڭ ايتۋىنشا, مەكەمەدە جەدەل بولىمگە قوسا, پەدياتريالىق, فەلدشەرلىك بولىمدەر جۇمىس ىستەيدى.
جالپى, ءبىر ادامعا قىزمەت كورسەتۋ ۋاقىتى بار-جوعى 30 سەكۋند بولسا, اتالعان مەكەنجايعا بريگادا اتتاندىرۋ ۋاقىتى 5 سەكۋندتى قۇرايدى. جەدەلدىك دەگەن – وسى!
جۇرەگىڭە جۇك تۇسپەسىن!
كەزەكتى شاقىرتۋدىڭ بىرىنە ىلەسىپ بارۋدى ءجون كوردىك. ورتا جاستاعى ەر ادامنىڭ كەنەتتەن جۇرەك تۇسى اۋىرىپ, شانشىعان. العاشقى مەديتسينالىق كومەكككە مۇقتاج جاننىڭ قان قىسىمى تەكسەرىلىپ, كارديوگرامما جاسالعاننان كەيىن تەز ارادا اۋرۋحاناعا جاتۋ كەرەكتىگى ايتىلدى. بىرنەشە مينۋتتىڭ ىشىندە جەدەل جاردەم بريگاداسى ناۋقاستى دەرەۋ اۋرۋحاناعا الىپ كەتتى.
جۇرەك دەمەكشى, رەسمي مالىمەتتەرگە سۇيەنسەك, بۇل اۋرۋ الەم بويىنشا كوبەيىپ بارادى. ءارى جاس تالعامايدى. استانا قالاسىنىڭ دەنساۋلىق ساقتاۋ باسقارماسى جۇرەك قان-تامىر اۋرۋىنان بولاتىن ءولىم-ءجىتىمدى ازايتۋ ءۇشىن ارنايى شارالاردى قولعا الدى.
دارىگەرلەردىڭ ايتۋىنشا, جالپى, جۇرەك يشەميا اۋرۋى تىكەلەي قان قىسىمىنا بايلانىس-تى. ەگەر دەر كەزىندە ەمدەمەسە بۇيرەكتىڭ, جۇرەكتىڭ قىزمەتى بۇزىلادى. جۇرەك كەڭەيىپ كەتىپ, قان جۇرمەي, سول ماڭاي جانسىزدانادى. ياعني, بۇل ينفارك-تكە اكەلەدى. ال, ميعا قان بارماي قالعان جاعدايدا, ناۋقاس ينسۋلتقا ۇشىراۋى مۇمكىن. سوندىقتان, ءاربىر ادام جۇرەگىن ايالاپ, كۇتكەنى ابزال.
ءار قوڭىراۋ – ادام تاعدىرى
كوپشىلىك جەدەل جاردەمنىڭ قىزمەتىن ەمەس, كەلىپ جەتۋ ۋاقىتىن ءجيى سىنايدى. شىن مانىندە, ەلوردادا جادەل جاردەم كولىكتەرىنىڭ سانى جەتكىلىكتى. قازىرگى ۋاقىتتا مەكەمە بالانسىندا 83 تەحنيكا بار. سوڭعى ەكى جىل ىشىندە اۆتوپارك 15 جاڭا ماشينامەن تولىققان.
جىلدام جەتۋگە كەرى اسەر ەتەتىن فاكتوردىڭ ءبىرى – جۇرگىزۋشىلەردىڭ جول بەرمەۋى. ونىڭ ۇستىنە كەيبىر تۇرعىن ۇيلەردىڭ اۋلاسى وتە تار, ءارى كولىكتەن كوز اشپايدى.
– كەيدە مەجەلى جەرگە جەتكەنمەن, ءۇيدىڭ اۋلاسىنا كىرە الماي قالاتىنىمىز بار. جولدا جۇرگەن سوڭ ءتۇرلى وقيعالار بولادى. رىسقۇلبەكوۆ كوشەسىنە شاقىرىپ الىپ, وزدەرى رىسقۇلوۆ كوشەسىندە تۇراتىن بولىپ شىعادى. ەندى ءبىرى ەسىگىن اشپاي قويادى. جالپى, اۆتوبۋس قوزعالىسىنا ارنالعان ارنايى «Bus Lane» جولاقتارىنىڭ ارقاسىندا ءبىزدىڭ كولىكتەر جىلدام جەتىپ, جول ءجۇرۋ ۋاقىتىن ۇنەمدەيدى, – دەيدى ءوزىن مارات دەپ تانىستىرعان جۇرگىزۋشى.
راس, كۇنى-ءتۇنى جۇمىس ىستەيتىن ولاردىڭ قىزمەتى اۋىر ءارى جاۋاپكەرشىلىگى مول. ءار قوڭىراۋدىڭ ارتىندا ادام تاعدىرى تۇر. سوندىقتان, جەدەل جاردەم قىزمەتىنە ءاردايىم جول بەرىڭىزدەر!
گۇلميرا ايماعانبەت
