Есілге кеме түсті
Кеше Есіл өзенінің кеме жүретін учаскесінде оныншы навигация салтанатты түрде ашылды деп хабарлады елорда әкімдігінің ресми сайты.
Серуенге арналған кеменің алғашқы жолаушылары дәстүр бойынша «Нұрлы жүрек» әлеуметтік қызмет көрсету орталығының тәрбиеленушілері болды. Ресми бөлімнен кейін мүмкіндігі шектеулі балалар теплоходпен тегін қыдырып келді.
«Есіл-Астана» МКҚК директоры Қанат Алин биыл астаналықтар мен қала меймандарын өзенде серуендету үшін алты жолаушы кемесі жүзетін болады деп мәлім етті.
«Дәстүрлі навигация кезінде астана тұрғындары мен қонақтары су көлігінің қызметін пайдалана алады. 2009 жылы бізде бар болғаны 5 кеме болса, бүгінде олардың саны 14-ке жетті, оның 6 кемесі жолаушыларға қызмет етеді. Олардың жалпы сыйымдылығы 265 орынды құрайды» деп атап өтті мекеме басшысы.
Айта кетейік, Амфитеатр ауданындағы жаяу жүргіншілер көпірін салу бойынша жүргізіліп жатқан құрылыс-монтаж жұмыстарына байланысты, Астана әкімдігі уақытша қозғалыс бағдарын бекітті: отырғызу Кенесары ескерткішінен төменде орналасқан ротондадан – су реттейтін плотина – Амфитеатр – Кенесары ескерткішінен төмен орналасқан ротондаға өзгертілді.
Маршруттың ұзақтығы – 3 км, ал уақыты – 25-30 минут. Өзенде саяхаттаудың экскурсиялық-қыдыру қызметінің бағасы ересектер үшін – 500 теңге, балалар үшін – 250 теңге.
Көпір құрылысы жөнделгеннен кейін «Астана-Есіл» қайтадан бұрынғы бекітілген маршрут бойынша Кенесары ескерткішінен Ақордаға дейін қашықтығы 18,8 шақырымға жолаушылар тасымалдайды. Ол кезде қызмет көрсету үлкендерге – 1000 теңге, балаларға 500 теңге болмақ.
Есіл өзеніндегі кеме жүзу маусымы 31 қазанға дейін жалғасады.