Astana qalasynyŋ prokuraturasynda ötken jiynda äkımşılık aiyppūldy SMS arqyly töleudıŋ tiımdılıgı söz boldy.
Ötken on aidyŋ qorytyndysy boiynşa jol jüru erejesın būzǧan 140 myŋnan asa elordalyq jürgızuşıge habarlama SMS arqyly jıberılgen. Sonyŋ nätijesınde bır aptanyŋ ışınde aiyppūl qaryzdaryn töleuşıler sany 50579-dan 91580 adamǧa deiın ösken. Būl degenıŋız, barlyq aiyppūl qaryzy bar adamdardyŋ 75 paiyzy bolyp tabylady. Būǧan eger ereje būzǧan jürgızuşı körsetılgen aiyppūldy jetı künnıŋ ışınde tölese, oǧan elu paiyz jeŋıldık jasalatyny turaly qoldanystaǧy zaŋǧa engızılgen tüzetu de sebep bolyp otyr.
– Būl halyqqa da, polisiia qyzmetıne de tiımdı. Būryn toltyrylǧan aiyppūl hattama habarlamalary ereje būzuşyǧa poşta arqyly jıberılıp, mekenjailarynyŋ auysyp ketuıne nemese poşta qyzmetınıŋ sapasyzdyǧyna bailanysty uaqytynda jetpei jatatyn. Saraptama körsetıp otyrǧandai, ötken bes jylda barlyq salynǧan aiyppūldyŋ tek 50 paiyzy ǧana tölenıp kelıptı. Mıne, aiyppūl töleudıŋ jaŋa täsılı elordada osy jyldyŋ säuır aiynan bastap engızıle bastaǧaly būl baǧyttaǧy jūmystar jandana tüsude, – dedı qalalyq prokuraturanyŋ jauapty qyzmetkerı Dosbol Esımseiıt.
Ras, bastapqy kezde toltyrylǧan aiyppūl hattamasyna, ol jetı kün ışınde tölense, elu paiyz jeŋıldık bolatyny turaly kelgen SMS habarlamaǧa küdıkpen qaraǧandar da boldy. Osyndai küdıkterdı seiıltu maqsatynda Astana qalasynyŋ prokuraturasy polisiia departamentımen bırlese otyryp, qolǧa alǧan oŋ täjıribenı basqa da memlekettık organdardy qatystyryp, jetıldıre tüstı. Endı jol jüru erejesı būzylǧan jaǧdaida, tölenetın aiyppūl turaly barlyq mälımetter äkımşılık qūqyq būzuşylyqtyŋ bıryŋǧai reestrıne tırkeledı. Sol arqyly «elektrondy ükımet» portalynyŋ bıryŋǧai bailanys ortalyǧy qūqyq būzuşyǧa tölenbegen aiyppūl kölemın körsetıp, SMS habarlama jıberedı. Söitıp, uaqytyŋyzdy da, aqşaŋyzdy da ünemdeuge mümkındık tuyp otyr.
